Qazaqstan halqy Assambleıasynan Májilis depýtattyǵyna kandıdattar usynyldy

NUR-SULTAN. QazAqparat - Qazaqstan halqy Assambleıasy Parlament Májilisine eki kandıdatty usyndy. Bul týraly QR Ortalyq saılaý komıssııasynan málim etti, dep habarlaıdy QazAqparat.

Búgin Ortalyq saılaý komıssııasynyń tóraǵasy Nurlan Ábdirovtiń tóraǵalyǵymen vedomstvo otyrysy ótti. Onda QR Parlamenti Májilisiniń shyǵyp qalǵan depýtatynyń ornyna saılaý úshin Qazaqstan halqy Assambleıasynan usynylǵan kandıdattardy tirkeý máselesi qaraldy. Daýys berý bıylǵy 28 sáýirge taǵaıyndalǵan.

Qazaqstan halqy Assambleıasy keńesiniń sheshimimen Májilis depýtattyǵyna 2 kandıdat usynyldy:

1) Kýzıev Zakırjan Pırmýhamedovıch – 1969 jyly týǵan, uıǵyr, «Ýnıversal» JShS Baqylaý keńesiniń tóraǵasy, Almaty qalasynda turady;

2) Tvarıonas Vıtalıı Iono – 1964 jyly týǵan, ulty lıtvalyq, «Vıkıng» «Memlekettik emes kúzet qurylymy» JShS zańgeri, Qaraǵandy qalasynda turady.

Ortsaılaýkom músheleri atalǵan kandıdattardy tirkeý týraly qaýly qabyldady. Úmitkerler saılaý bıýlletenine engiziledi.

Aıta keteıik, saılaý bıýlletenine «bárine qarsymyn» joly engiziledi. Saılaý bıýlletenderi memlekettik tilde jáne orys tilinde basylady.