Qazaqstan halqy Assambleıasy jańa Joldaýdyń mindetterin tolyq qoldaıdy - QHA úndeýi
«Qurmetti otandastar! Qazaqstan prezıdenti Nursultan Nazarbaevtyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýy qoǵamnyń ózekti áleýmettik saýaldaryna naqty jaýap boldy. Bul - memlekettik organdar, bıznes pen qoǵam úshin is-qımyldyń tutas strategııasyn aıqyndaıtyn, óziniń máni men mazmuny jaǵynan erekshe qujat», - delingen Úndeýde.
Joldaýdaǵy basty maqsat - qazaqstandyqtardyń ál-aýqatyn arttyrý jáne bul úshin naqty mindetterdi iske asyrý kózdelgen.
«Eń tómengi jalaqyny ósirý, bıznestiń jol kartasyn jalǵastyrý, turǵyn-úı kommýnaldyq sharýashylyq qyzmetterine arnalǵan tarıfterde tártip ornatý jónindegi sharalar jáne basqa da qadamdar - tabystyń ósýiniń turaqtylyǵyna yqpal etedi. Bilim berý, ǵylym jáne densaýlyq saqtaý salasyna jumsalatyn qarajatty arttyrý, ýchaskelik medıtsına qyzmetkerleriniń jekelegen sanattaryna eńbekaqyny kóterý, salaýatty ómir saltyn damytý, halyqty sapasyz taýarlar men qyzmetterden qorǵaý - bul turmys sapasyn jaqsartý jónindegi senimdi qadamdar», - dep jazylǵan qujatta.
Al turǵyn úı máselelerin sheshý, jergilikti joldardy jóndeý, aýyldardy sýmen jabdyqtaýdy damytý, ekologııany jaqsartý, azamattardyń qaýipsizdigin qamtamasyz etý jónidegi sharalar - jaıly ómir súrý ortasyn qurýǵa qyzmet etedi. Sonymen qatar jastardy jáne otbasy ınstıtýtyn keshendi qoldaý memlekettik saıasattyń basymdyǵy ekenin atap ótken jón. Al 2019 jyl - «Jastar jyly» dep jarııalandy.
«Qurmetti qazaqstandyqtar! Memleket basshysy halyqtyń áleýmettik kóńil-kúıi men ómir súrý sapasyn jaqsartý jónindegi teńdessiz sharalardy belgiledi. Prezıdent bul maqsattarǵa bizdiń qoǵamymyzdy kelisim men birlikti saqtaý arqyly ǵana qol jetkizý múmkin ekendigin atap ótti. Qazaqstan halqy Assambleıasy jańa Joldaýdyń mindetterin tolyq qoldaıdy jáne olardy júzege asyrý men túsindirýge belsendi qatysady. Biz barlyq qazaqstandyqtardy ulttyq ál-aýqatty memleket qurylysynyń maqsattaryna qol jetkizý úshin birigýge shaqyramyz. Osynyń bári Qazaqstandaǵy beıbitshilik pen kelisimniń negizgi tuǵyry. Biz, Joldaýdyń júzege asyrylýy qoǵamdyq kelisim men jalpyulttyq birliktiń, azamattardyń ál-aýqatyn arttyrýdyń, Otanymyzdyń gúldenýiniń berik kepili bolatynyna senimdimiz», - dep úndeý jarııalady Qazaqstan halqy Assambleıasynyń ókilderi.
Aıta keteıik, úndeý Astanada «Prezıdent Joldaýyndaǵy mindetterdi iske asyrýdaǵy Qazaqstan halqy Assambleıasynyń orny men róli» atty QHA Keńesiniń keńeıtilgen otyrysynda oqyldy. Otyrys barysynda Prezıdenttiń Qazaqstan halqyna Joldaýyndaǵy negizgi erejeler, Joldaýdy iske asyrý boıynsha QHA aldynda turǵan mindetter qaraldy.
Keshe Qazaqstan Prezıdenti Nursultan Nazarbaev «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýyn jarııalady.