Qazaqstan halqy Assambleıasy ulysaralyq qatynastardy úılestirýde zor ról atqarýda - Májilis tóraǵasy O.Muhamedjanov

ASTANA. 17 sáýir. QazAqparat /Muratbek Maqulbekov/ - 1995 jyly el Prezıdentiniń bastamasymen qurylǵan Qazaqstan halqy Assambleıasy ulysaralyq qatynastardy úılestirýde jáne qoǵamdy toptastyrýda ınstıtýtsıonaldyq deńgeıde úlken ról atqarýda.

Bul týraly QR Parlamenti Májilisiniń tóraǵasy Oral Muhamedjanov QHA múshelerimen kezdesý barysynda aıtty.

«Qazaqstan halqy Assambleıasy ózi qurylǵan sátten bastap elimizde turatyn barlyq ulystar múddeleriniń qajetti tepe-teńdigin qamtamasyz etip otyrǵan Qazaqstannyń saıası júıesiniń mańyzdy elementine aınaldy», - dedi O.Muhamedjanov.

Spıker «Jańa Qazaqstan» depýtattyq tobyna birikken halyq qalaýlylary eldiń zańnamalyq bazasyn jetildirýde «Nur Otan» HDP-nyń depýtat-múshelerimen birge belsendi jumys jasaı otyryp, joǵary zańnamalyq organ men Qazaqstan halqy Assambleıasy arasyndaǵy mańyzdy baılanystyrýshy býyn bolyp otyrǵanyn atap ótti.

Kezdesýde Májilistiń vıtse-spıkeri Vladımır Bobrov, QHA tóraǵasynyń orynbasary- hatshylyq meńgerýshisi Eraly Toǵjanov, sondaı-aq QHA tóraǵasynyń orynbasary ıÝrıı Tımoşenko, QHA-dan Májilis depýtattary jáne Májilistegi «Jańa Qazaqstan» depýtattyq tobynyń músheleri sóz sóıledi. Qonaqtar depýtattarmen birge parlamenttik ǵımarattardy aralap kórdi jáne estelik retinde sýretke tústi.

Kezdesý barysynda sóılegen Assambleıa músheleri óz aımaqtaryndaǵy istiń jaıy, etnomádenı birlestikterdiń jetistikteri jáne búgingi tańdaǵy atqaryp jatqan jumystary týraly baıandady.