Qazaqstan halqy Assambleıasy Ýkraına elshisiniń sózin aıyptady
12:03, 23 Tamyz 2022
NUR-SULTAN. QazAqparat – Qazaqstan halqy Assambleıasy Ýkraına elshisi Petr Vrýblevskııdiń qazaqstandyq blogerge aıtqan sózin aıyptady, dep habarlaıdy QazAqparat.
«Biz, Qazaqstan halqy Assambleıasynyń músheleri, Qazaqstan Respýblıkasyndaǵy Ýkraına elshisi Petr Vrýblevskıı myrzanyń qazaqstandyq blogerlerdiń birine bergen suhbatynda aıtqan sózderin qatań aıyptaımyz jáne ondaı saryndaǵy málimdelerge jol berýge bolmaıdy dep sanaımyz. Beıbitshilik pen birlik bizdiń memlekettik saıasattyń jáne qoǵamdyq birigýdiń basty qaǵıdalary. Sondyqtan mundaı pikirdi kim aıtsa da bizdiń qarsylyǵymyzǵa ushyraıdy», - delingen Assambleıa habarlamasynda.
Sonymen qatar uıym dıplomatııa – óshpendilik pen arazdyqty qozdyrý úshin emes, beıbitshilik pen yntymaqtastyq ıdealdaryna qyzmet etýi tıis ekenin jetkizdi.
«Qazaqstannyń birtutas kópetnosty halqy úshin dostyq, ózara kómek jáne beıbitshilik qaǵıdalary myzǵymaıtyn ustanym. Olar bizge Táýelsizdigimizdiń qalyptasýynyń eń qıyn jyldarynda da etnosaralyq qaqtyǵystardyń aldyn alyp, elimiz ben halqymyzdyń tutastyǵyn saqtaýǵa kómektesti. Óshpendilikti qozdyratyn kez-kelgen pikir, etnostyq jek kórýshilik pen onyń qandaı bolmasyn kórinisterin nasıhattaý biz úshin jat uǵym. Barlyq qazaqstandyqtardy dushpandyq pen zulymdyqty nasıhattaıtyn arandatýlarǵa ermeı, urpaqtyń búgini men bolashaǵy úshin eldegi beıbitshilik pen halyq birligin saqtaýǵa jáne nyǵaıtýǵa shaqyramyz»,- dep tolyqtyrdy Assambleıa.