Qazaqstan halqy Assambleıasy Prezıdent bastamalaryn júzege asyrýǵa kómektesedi
31 naýryzda Prezıdent Qasym-Jomart Toqaev Qazaqstan halqyna azamattardy jáne bıznesti qoldaý sharalary týraly úndeý jasaǵan edi.
«Bul úndeý munaı baǵasy men koronavırýs pandemııasy áserinen týyndaǵan álemdik ekonomıkalyq «týrbýlenttiktiń» buryn-sońdy bolmaǵan kúrdeli jaǵdaıynda aıtyldy. BUU Bas hatshysy A. Gýterresh bul jaǵdaıdy Ekinshi dúnıejúzilik soǵystan keıingi kezeńdegi eń kúrdeli daǵdarys dep atady jáne bul jaı ǵana sóz emes. Boljam boıynsha, álemde 25 mıllıon adam jumysynan aıyrylyp, ekonomıkalyq baılanystar kúrdelenedi, bıznes turalap, jańa kedergiler paıda bolady. Álem kóz ilespes jyldamdyqpen ózgerýde», - delingen resmı málimdemede.
Osyndaı kúrdeli jaǵdaıda Memleket basshysy eldiń áleýmettik-ekonomıkalyq damý qarqynyn jiti qadaǵalap, halyqtyń eń shuǵyl qajettilikterine der kezinde nazar aýdarady.
«Prezıdent Q. Toqaevtyń basshylyǵymen Qazaqstan jappaı taralǵan indettiń aldyn alý sharalaryn ýaqytynda qabyldady, Tuńǵysh Prezıdent - Elbasy N.Á. Nazarbaevtyń bastamasymen qurylǵan QR Ulttyq qory – «qaýipsizdik belbeýi» tıimdi jumys isteıdi. Qazaqstan Ata zańda belgilengen áleýmettik memleket týraly konstıtýtsııalyq normany senimdi jáne múltiksiz oryndaıdy», - deıdi QHA keńesi.
Prezıdent Q. Toqaev zeınetaqy men memlekettik járdemaqyny, ataýly áleýmettik kómekti jyldyq 10%-ǵa ındeksatsııalaýdy tapsyrdy. Barlyq azamattardyń mindetti áleýmettik medıtsınalyq saqtandyrý júıesindegi medıtsınalyq kómek alý quqyǵy 1 sáýirden 1 shildege deıin uzartylady.
Qazaqstan halqy Assambleıasy Memleket basshysynyń málimdemesin tutastaı jáne tolyǵymen qoldaı otyryp, olardy iske asyrýǵa jan-jaqty azamattyq qoldaý kórsetý qajettigin málimdeıdi.
«Biz osyndaı sátte jaýapkershilikti tek memleketke ǵana aýdara salýǵa quqyǵymyz joq. Mejelengen nátıjege qol jetkizý árbir azamattyń búgingi tańda karantındik sharalardy qatań saqtaýynan bastalady. Bizdiń bul iske azamattyq atsalysýymyzdyń kelesi vektory Prezıdenttiń jańa bastamalaryn iske asyrýǵa belsendi járdemdesýge baǵyttalýy tıis», - deıdi Assambleıa.
QHA músheleri karantın jaǵdaıynda qoljetimdi áleýmettik jelilerdiń, elektrondyq taratylymdardyń, ózderiniń azamattyq baılanystarynyń múmkindikterin paıdalana otyryp, ózin-ózi jumyspen qamtyǵan azamattar arasynda keń aýqymdy túsindirý jumystaryn júrgizedi. Aqparattyq jumys 3 mıllıonǵa jýyq azamattardy eń tómengi jalaqy mólsherinde qosymsha áleýmettik tólemdermen qamtý; azamattardyń túrli sanatyn tegin azyq-túlik jáne turmystyq jıyntyqtarmen qamtamasyz etý jáne olardy óndirý men jetkizý jumystaryna jergilikti shaǵyn jáne orta bıznesti tartý sııaqty sharalardy qamtýy tıis.
Qazaqstan halqy Assambleıasy Memleket basshysynyń kóktemgi egis jumystaryn ýaqytynda júrgizý jáne shaǵyn jáne orta sharýa qojalyqtaryn qoldaý, jańa jumys oryndaryn ashý jónindegi tapsyrmasyna erekshe nazar aýdarýǵa shaqyrady. Aýyl sharýashylyǵy óndirisinde tájirıbesi mol QHA músheleri Prezıdent bastamalaryn júzege asyrý úshin qajetti kómek kórsetý, aýyl sharýashylyǵy ónimderin óndirýshi jastarǵa qamqorlyq jasaý, keńes berý jáne ózge de qoldaý sharalaryn jasaıdy.
«Biz, Qazaqstan halqy Assambleıasynyń músheleri, Prezıdent Q.Toqaevtyń tapsyrmalaryn iske asyrýǵa barynsha qoǵamdyq baqylaýdy qamtamasyz etýge nıettimiz. Óıtkeni álemdik daǵdarys pen retsessııa jaǵdaıyndaǵy bizdiń elimizdiń qarjylyq múmkindikteri de shekteýli. Qazaqstan halqy Assambleıasy elimizdiń barlyq azamattaryn Memleket basshysy belgilegen tapsyrmalardy oryndaýǵa joǵary jaýapkershilikpen qaraýǵa, olardy tıimdi iske asyrý úshin sanalylyq tanytyp, yntymaqtyń jáne belsendi azamattyq ustanymnyń úlgisin kórsetýge shaqyrady» delingen málimdemede.