Qazaqstan halqy Assambleıasy mýltımedııalyq portal qurady
«QHA kafedralary men ortalyqtaryn jáne óńirlik bólimderin biriktiretin QHA ǵylymı-saraptamalyq keńesiniń biryńǵaı saraptamalyq zertteý jelisin qurý kerek. Ol úshin 2017-2018 jyldary QR Aqparat jáne kommýnıkatsııalar mınıstrligi janynan qurylatyn QHA mýltımedııalyq portalynyń múmkindikterin tıimdi paıdalaný kerek. Portaldy qurý jumystary júrip jatyr. Bul qoldanýshy aýdıtorııa úshin QHA saraptamalyq ortasyna, aqparattyq jáne saraptamalyq baǵalaýyna qoldaý bildirýge múmkindik beredi», - dedi Tóraǵa orynbasary Darhan Myńbaı búgin Astanada ótken QHA ǵylymı-saraptamalyq keńesiniń keńeıtilgen otyrysynda.
Odan bólek, otyrysta qoǵamdyq sanany jańǵyrtýǵa baǵyttalǵan «Týǵan jer», «Qazaqstannyń kıeli jerleri», «Qazaqstannyń 100 jańa tulǵasy», «Jahandyq zamanaýı qazaqstandyq mádenıet», «Qazaq álipbıin latynǵa aýystyrý», qoǵamdyq jáne gýmanıtarlyq ǵylymdar boıynsha «Qazaq tilindegi 100 jańa oqýlyq» jobalary aınalasynda tanymal ǵylymı-aqparattyq orta qurý qajettigi aıtyldy.
«Ásirese, «Týǵan jer» jobasynyń tájirıbelik mańyzdylyǵyn erekshe atap ótkim keledi. Bul baǵdarlama Qazaqstannyń barlyq etnostaryna arnalǵan. Bul bizdiń birligimiz ben azamattyq sáıkestiligimizdi nyǵaıtatyn naqty ister. Osyǵan baılanysty, óńirlerde tarıhty, mádenı eskertkishter men tulǵalardy zertteý tájirıbesin júıelep, qorytyp, nasıhattaǵan jón», - dedi Darhan Myńbaı.