Qazaqstan halqy Assambleıasy qostanaılyqtarǵa 40 tonna gýmanıtarlyq kómek jiberdi

NUR-SULTAN. QazAqparat – Qazaqstan halqy Assambleıasy Qostanaı oblysyndaǵy tótenshe jaǵdaıdan zardap shekken jandarǵa 40 tonna gýmanıtarlyq kómek jóneltti, dep habarlaıdy QazAqparat tilshisi.

«Jeksenbiden bastap Nur-Sultan qalasynyń «Dostyq» úıinde gýmanıtarlyq kómek jınala bastady. Qostanaılyqtarǵa kómekke qaladaǵy etnomádenı birlestikter, QHA janyndaǵy kásipkerler qaýymdastyǵy, qarapaıym turǵyndar men metsenattar qol ushyn sozyp otyr. Nátıjesinde 40 tonnadan astam gýmanıtarlyq kómek jınaldy. Taǵy da kómek kórsetemin degenderge qurylys materıaldarynyń kerektigin aıtyp jatyrmyz. Múmkin bolsa, qaıyrymdylyq qorlarynyń shotyna aqsha aýdarýdy da suraımyz. Tótenshe jaǵdaıda adamdardyń bir-birine kómektesip, qoldaýy óte mańyzdy», - dedi Nur-Sultan qalasy ákimdigi ishki saıasat basqarmasynyń basshysy Dáýren Babamuratov.

Onyń aıtýynsha, ótken demalysta elorda alǵashqylardyń birip bolyp, qostanaılyqtarǵa 8 júk kóligimen azyq-túlik jiberdi. Endigi ýaqytta qurylys materıaldaryna suranys artyp otyr.

Sondaı-aq, QHA janyndaǵy kásipkerler qaýymdastyǵy órt saldarynan zardap shekken jandarǵa úı salýda kómekke daıyn ekendikterin jetkizdi. Odan bólek, qaýymdastyq ókilderi Qostanaı jurtyna zań jaǵynan tegin keńes berýge daıyn.

Qaıyrymdylyq sharany uıymdastyrýshylardyń málimetinshe, Qazaqstan halqy Assembleıasy bıyl elordada 22 qaıyrymdylyq aktsııasyn uıymdastyryp, 1 myńnan astam adamǵa kómek kórsetken.