Qazaqstan halqy Assambleıasy qazaq tilin 4 apta ishinde úırenýdiń ádistemesin ázirledi

ASTANA. 6 naýryz. QazAqparat - Qazaqstan halqy Assambleıasy ózge ult ókilderine arnap qazaq tilin jedel úırenýdiń ádistemesin ázirledi.

Búgin uıym janyndaǵy «Tildaryn» tilderdi oqytý tehnologııalarynyń ádistemelik ortalyǵy 1 aıdyń ishinde daıyndalǵan jańa ádistemeniń jobasyn dúıim jurtqa tanystyrdy. Jobany ázirlegen ǵalym­dar toby jańa ádistemeni, eń aldymen, elshilikterde isteıtin qyzmetkerler arasynda synap kórgen. 

Ádisteme negizi retinde belgili reseılik psıholıngvıst, álemniń 30 tilin meńgergen, tilderdi jedeldetip meńgerýdiń biregeı ádistemeleriniń avtory Dmıtrıı Petrovtyń tájirıbesi alyndy.   

Birneshe sabaqtan tu­ra­tyn kýrs barysynda tyńdaýshylar ar­naıy beınematerıaldardy kó­rip, til us­tar­týdyń negizgi erejelerin zerdelegen. Osydan ke­ıin sóz qurylymdaryn zerttep, arnaıy dybys jazý tehnıkasyna súıenip, 300-400-ge jýyq qa­zaq tilinde jıi kezdesetin sózder­di jattaǵan. Osy kýrstan ótken qazaq tilin múldem bilmeıtin bir top azamat qysqa ýaqyttyń ishinde qazaq tiliniń bazalyq bilimin, aýyzeki tilde suhbat­tasýdy úırenip shyqqan. Jańa ádistemeni ázirlegen ǵalymdar atalǵan júıeniń arqa­synda memlekettik tildi tórt ap­tanyń ishinde, ıaǵnı bir aıda meń­gerip shyǵýǵa bolatyndyǵyn dáleldedi.

Avtorlar toby ázirlenip jatqan ádistemelik jobany «Tildaryn» dep atady. 

Psıholıngvıst-ǵalym D. Petrovtyń aıtýynsha, bul júıe tildi meńgerý kezindegi san alýan psıhologııa­lyq kedergilerdi jeńýge kómek­tesip, tildik normalardy erkin ıge­rýge múmkindik beredi. 

«Mende tildik tosqaýyldar men qorqynysh boldy. Biraq qysqa ýaqyt ishinde olar izim-ǵaıym joǵaldy. Meniń oıymsha bul ádisteme óte qyzyqty, jańa ári basqalaryna uqsamaıtyn ádisteme. Óıtkeni grammatıka túsinikti formada, shema arqyly baıandalady», - deıdi 3 apta ishinde qazaq tilinde sóıleıtindeı deńgeıde úırengen Qazaqstandaǵy Japon elshiliginiń attashesi Akıo ıAdıhashı.  

«Bizdiń ádistememiz jeke adamdardyń ómirlerine qatysty 8 taqyryp aıasynda qurastyryldy. Sonymen qatar, jıi qoldanysta bolatyn 400-ge jýyq sóz endi jáne 15 shaqty grammatıkalyq konstrýktsııalar kirdi. Biz Dmıtrıı Petrovtyń kózqarasyn, biregeı ádisin aldyq. Sol sebepti bul konstrýktsııalar meniń stýdentterime bir konstrýktsııadan birneshe kombınatsııalar jasaýǵa zor yqpal etti», - deıdi memlekettik tildi jedeldetip oqytý ádistemesiniń avtory, «Parasat jáne Dil» qoǵamdyq birlestiginiń dırektory Quralaı Mutanova.