Qazaqstan halqy Assambleıasy elimizdiń brendine aınaldy - Májilis depýtaty A.Mýradov
Onyń aıtýynsha, barlyq úkimettik nemese parlamenttik quramdaǵy sheteldik saparlarda Qazaqstan halqy Assambleıasynyń múshelerinen, ulystyq toptardan bir ókil mindetti túrde qosa barady. Olar árdaıym shet memleketterde Qazaqstannyń ulysaralyq tatýlyǵy modelin dáriptep, el bedelin kótermelep otyrady. Sońǵy kezde ózekti bolyp otyrǵan Eýrazııalyq ekonomıkalyq elder arasynda da kórinbeıtin kópir salyp, múshe memleketter halyqtarynyń ekonomıkalyq baılanystaryn ózara senim arqyly kúsheıtýge úles qosýda.
«Sondyqtan Assambleıa Qazaqstan brendine aınaldy. Uıym arqyly ımıdjdik jobalardy qolǵa ala bastaý kerek. Bir jaǵynan ol bizdiń ulysaralyq birlikti saqtaýdyń modelin dáripteıtin negizgi resýrs», - dep atap ótti A.Muradov QR Prezıdenti janyndaǵy Ortalyq kommýnıkatsııalar qyzmetinde ótken brıfıngte.
Assambleıanyń bul qurmetti orny týraly Shvetsııanyń Ýppsala qalasynda ótken ulysaralyq áriptestik halyqaralyq konferentsııasynda talqylanǵan.
«Qazaqstan halqy Assambleıasynyń jumysyna qyzyǵýshylyq tanytatyndar 24 jylda Qazaqstan qalaısha qaqtyǵystardan aman qaldy degen saýal qoıady. Olar óz elderinde tolyqtaı ornyǵa almaı jatyr jáne bizdiń elden osyndaı tatýlyqtyń, birliktiń uıa salýyna yqpal etken eń negizgi faktordy bilgileri keledi. Bizdiń jerimizdegi ál-aýqattylyqtyń matrıtsasy - qazaq halqynyń toleranttylyǵy. Bul faktordy negizge alynbasa, qalǵannyń barlyǵy jáı paıymdaý bolyp ketedi. Qazaqstan halqy Assambleıasynda bul týraly naqty belgilengen», - deıdi depýtat.
QR Prezıdentiniń janyndaǵy Memlekettik basqarý akademııasy Ortalyq Azııa óńirindegi ulysaralyq jáne konfessııaaralyq qatynastardy zertteý ortalyǵynyń dırektory Aıgúl Sádýaqasovanyń habarlaýynsha, eldegi beıbitshilik tiregine aınalǵan Qazaqstan halqy Assambleıasynyń tájirıbesi kóptegen elderdiń sarapshylaryn qyzyqtyrady.
«Qazaqstannyń tatýlyq modeline Baltyq elderiniń sarapshylary óte úlken qyzyǵýshylyq tanytty. Sebebi atalmysh Eýropalyq odaqqa múshe úsh elde ishki máseleler, onyń ishinde taraptardyń múddelerin qorǵaý, azamattyq quqyq salasyndaǵy kóptegen jaıttar asa ózekti. Sondaı-aq úlken yntyzarlyqty Ýkraına ǵalymdarynan, Anglııa ýnıversıtetterinen baıqadyq. Ásirese olardy til saıasaty tolǵandyrdy. Belgili bir shekteýler nemese basymdyqtar baryn ne joǵyn bilgileri keledi. Máselen, maǵan balalar mektepterdi jáne oqytý tilin qalaı tańdaıdy degen saýal qoıdy. Bizde ata-analardyń jáne oqýshylardyń tilegi boıynsha ózderi tańdaý jasaı alady dep jaýap berdim. Ulystardyń tilderin oqýǵa barlyq jaǵdaı jasalǵan», - deıdi ol.