Qazaqstan halqy Assambleıasy Elbasynyń densaýlyǵyna qatysty úndeý joldady

NUR-SULTAN. QazAqparat – Qazaqstan halqy Assambleıasy úndeýiElbasynyń koronavırýs juqtyryp alýyna baılanysty úndeý joldady. QazAqparat úndeýdiń tolyq mátinin jarııalaıdy.

***

Asa mártebeli Nursultan Ábishuly!

Álemge taralǵan koronavırýs Sizdi de aınalyp ótpegeni týraly jańalyq árbir qazaqstandyqtyń – el patrıottarynyń júreginde alańdaýshylyq týdyrdy.

Ózińiz birneshe ret eskertkendeı, indet óte qaýipti ekeni anyqtaldy.

Sáýir aıynyń basynda «Birlese bilgen el bárin jeńedi» atty maqalańyzda Siz koronavırýs ınfektsııasynyń saldarynan týyndaıtyn qaýip-qater jóninde halyqpen ashyq áńgimelesip, «Ult densaýlyǵy men memleket qaýipsizdigi – bir-birimen etene, egiz uǵymdar. Memleket bul qıyndyqtan shyǵý úshin qoldan kelgenniń bárin jasaıdy jáne tıisti sharanyń barlyǵyn atqarady. Birde-bir adam, elimizdiń eshbir azamaty qamqorlyqsyz qalmaıdy. Biz – birtutas el, birligi berik jurtpyz. Men árqashan halqymmen birge bolǵanmyn, bul joly da sizdermen birgemin. Biz birgemiz. Qıyndyqqa qaıyspaı, belimizdi bekem býyp, bereke-birligimizden aırylmaıyq» dep aıryqsha atap ótken edińiz.

Búgingi tańda Qazaqstannyń barsha azamattary Sizdiń tapsyrmalaryńyzdyń tolyǵymen oryndalǵanyn kórip otyr – azamattar buryn-sońdy bolmaǵan áleýmettik qoldaý aldy.

Prezıdent Q.Toqaev pen el Úkimeti halyqty pandemııadan qorǵaý, el ekonomıkasy men azamattardyń ál-aýqatyn jan-jaqty qoldaý jónindegi aýqymdy sharalar keshenin júzege asyrdy.

Osynyń bári halqymyzdyń syn saǵatta Sizdiń erik-jigerińizge jáne kemeńgerligińizge degen sheksiz seniminiń arqasynda múmkin boldy.

Al búginde búkil el halqy ár tilde Sizdiń saýyǵyp ketýińizge tilek bildirýde, barlyq dinder ókilderi Jaratýshydan Sizdiń aýrýdan aıyǵyp ketýińizdi suraıdy.

Bizdiń azamattarymyzdyń Ózińizge degen aq tilegi men janashyrlyǵy Sizge rýhanı kúsh pen sergektik syılap, aýrýdan aıyǵýǵa kómektesedi dep úmittenemiz!

Sizge tolyq saýyǵyp ketýdi jáne eldik murat jolyndaǵy eńseli isterińizdi jalǵastyrýdy tileımiz!

Aıta ketsek, búgin Elbasynyń baspasóz hatshysy Aıdos Úkibaı Qazaqstannyń Tuńǵysh Prezıdenti – Elbasy Nursultan Nazarbaevtyń Covid-19-ǵa tapsyrǵan synamasy oń nátıje kórsetkenin habarlaǵan edi. Soǵan qaramastan Nursultan Ábishuly ózin-ózi oqshaýlap, qashyqtan jumys isteýdi jalǵastyrýda.