Qazaqstan halqy Assambleıasy «Biz birgemiz» aktsııasynda 2 mlrd teńgege jýyq járdem kórsetken
«Qazaqstan halqy Assambleıasy men qaıyrymdylyq – ajyramas uǵymdarǵa aınaldy. Ózara kómek, járdem, yntymaqtastyq bizdi birtutas halyq etedi. Birligimizdiń tarıhynda Qyzylaǵash, Arys, Maqtaaral oqıǵalary este qaldy. Sol kezde zardap shekken qazaqstandyqtarǵa tutas el kómek kórsetti. Assambleıa alǵashqylardyń qatarynda boldy. 2020 jyly Assambleıanyń qaıyrymdy músheleri Prezıdent Qasym-Jomart Toqaevtyń úndeýine ún qosyp, «Biz birgemiz» aktsııasyna qatysty. Eriktiler men qaıyrymdylyq kórsetýshiler 1 mlrd 776 mln teńge jınap berdi. Muqtaj azamattarǵa 1 mlrd 339 mln teńgege túrli kómek kórsetildi. Aýrýhanalarǵa 151 mln teńgege dári-dármekter men ókpeni jasandy jeldetý apparattary satyp alyndy», - dedi spıker Táýelsizdiktiń 30 jyldyǵy men Alǵys aıtý kúniniń 5 jyldyǵyna arnalǵan dóńgelek ústelde.
Assambleıa Túrkistan oblysynda sý tasqynynan zardap shekkenderge 335 tonna gýmanıtarlyq kómek jibergen. Qurban aıt kúnderi «Myń alǵys» qaıyrymdylyq aktsııasy medıtsına qyzmetkerleri men olardyń otbasylaryna jalpy somasy 77 mln teńgeden astam kómek kórsetken. «Mektepke jol» aktsııasy 8 700 otbasyna noýtbýk syılaǵan.