Qazaqstan halqy Assambleıasy «100 jańa oqýlyq» jobasyna qatysty pikir bildirdi

ALMATY. QazAqparat - Qazaqstan halqy Assambleıasy Tóraǵasynyń orynbasary Ábilfas Hamedov «Qazaq tilindegi 100 jańa oqýlyq» jobasynyń ereksheligi jaıly pikir bildirdi, - dep habarlaıdy QazAqparat tilshisi.

Ábilfas Hamedovtyń aıtýynsha, joba aıasyndaǵy oqýlyqtar tól tilderinen aýdarylǵandyqtan, olardyń qundylyǵy artady. Sebebi tól tilden kásibı deńgeıde aýdarý kezinde oqýlyqtyń negizgi ıdeıasy, oıy jetkiziledi.

«Joba gýmanıtarlyq salany modernızatsııalaýdaǵy mańyzdy máselelerdi sheshýge baǵyttalǵan. Osy oqýlyqtarmen bilim alatyn stýdentter eńbegi qoǵamdyq sanany evolıýtsııalyq modernızatsııalaýdyń ǵylymı irgetasyn salýǵa negiz bolary anyq. Bul oqýlyqtar jańa urpaqtyń mamandaryn daıyndaý úshin qajet. Ýaqyt suranysyna saı damýdy ózimizge mindettep alǵandyqtan, bilimniń negizgi bulaǵy retinde joba aıasyndaǵy kitaptardyń tıer kómegi orasan zor», - deıdi Ábilfas Hamedov.

Onyń aıtýynsha, Qazaqstan halqy Assambleıasy ósip kele jatqan urpaqtyń ónegelik jáne mádenı tárbıesi jolynda úlken ról oınaıdy. Qazirgi tańnyń jas azamattary ýaqyttyń suranysyn sezinýde.

«Jastar óz aldyndaǵy sheshýge tıis máselelerdi aıqyn biledi. Bul kitaptar olardyń jetistikke jetýine serpin bereri anyq», - deıdi Ábilfas Hamedov.

Avtor: Albert Ahmetov