Qazaqstan halqy 20 mıllıonǵa jetetin kún alys emes - Elbasy

ASTANA. QazAqparat - Qazaqstan halqy 20 mıllıonǵa jetetin de kún alys emes. Bul týraly Memleket basshysy Nursultan Nazarbaev respýblıkalyq telearnalar arqyly Qazaqstan halqyna arnalǵan málimdemesinde aıtty, dep habarlaıdy QazAqparat tilshisi.

«Qazaqstan agrarly ekonomıkadan ónerkásiptik-servıstik ekonomıkaǵa ótti. Eldi ındýstrıalandyrý jáne ýrbanızatsııalaý protsesi júrip jatyr. Shıkizat sektoryna álemniń iri ınvestorlary keldi. Sonyń arqasynda munaı-gaz sektoryndaǵy kúrdeli jobalardy júzege asyra aldyq. Shıkizat resrýstary esebinen qazaqstandyqtardyń bolashaq urpaǵy úshin qor quryldy»,- dep atap ótti Elbasy.

Memleket basshysy Qazaqstan jahandyq ekonomıkanyń ajyramas bóligine aınalyp otyrǵandyǵyn basa aıtty.

«Investıtsııa tartyp, álemniń barlyq elderimen derlik saýda-sattyq júrgizip kelemiz. Elimiz jańa ınfraqurylymdyq deńgeıge boı kóterdi. Eldiń barlyq óńirin avtomobıl joldary men temir joldar baılanystyrdy. Al avıatsııa marshrýttary álemniń túkpir-túkpirine barýǵa múmkindik berip otyr. Qazaqstan tek aýmaǵy jaǵynan ǵana iri memleketke aınalǵan joq. Búginde azamattarymyzdyń sany 18 mln-nan asty. 20 mıllıonǵa jetetin kún de alys emes», - dedi Nursultan Nazarbaev.