Qazaqstan halqynyń sany 20 mln adamǵa jýyqtady

<p>Bir jyl ishinde el turǵyndarynyń sany 1,4%-ke artty. Kazinform bul týraly Finprom.kz saıtyna silteme jasap habarlaıdy.</p>

2023 jyldyń 1 qyrkúıegindegi jaǵdaı boıynsha, Qazaqstan halqynyń sany 19,9 mln adamǵa jetti. Bul kórsetkish byltyrǵy jylmen salystyrǵanda 1,41%-ke kóp.

Jyl bastalǵanda halyq sany 19,8 mln adam bolyp, jyldyq kórsetkish 1,35%-ke jetken. Jalpy el turǵyndary sanynyń ósý qarqyny 1,28%–1,49% shamasynda tur. 2022 jyly ǵana alǵash ret halyq sany 3,3%-ke óskeni baıqaldy.

2023 jyldyń 1 qyrkúıegindegi jaǵdaı boıynsha, turǵyn sany eń kóp óńirlerdiń úshtigi: Almaty qalasy (2,2 mln adam), Túrkistan oblysy (2,1 mln adam) jáne Almaty oblysy (1,5 mln adam). Halyq sany eń az aımaqtar – Ulytaý (221,5 myń adam), Soltústik Qazaqstan (531,7 myń) jáne Abaı (608,9 myń adam) oblystary eken.

Sonymen qatar, Soltústik Qazaqstan, Abaı, Jetisý, Shyǵys Qazaqstan jáne Qostanaı oblystarynda halyq sany azaıǵany baıqalǵan.

Jyl basyndaǵy kórsetkish boıynsha, erkekter sany jylyna 1,4%-ke, 9,6 mln adamǵa deıin, al áıelder sany 1,3%-ke, 10,1 mln adamǵa artqan.

Jalpy áıelder sany erkekterden 4,9%-ke kóp.

El turǵyndarynyń 35,5%-i, ıaǵnı 7 mln adam – 18 jasqa tolmaǵan bala. 29 jasqa deıingi kámeletke tolǵan jastar sany 2,7 mln adam bolyp shyqty.

60-69 jas aralyǵyndaǵy turǵyndar – 1,6 mln, 70-79 jas aralyǵy – 681,6 myń adam, 80 jastan asqan turǵyndar sany – 317,3 myń adam.