Qazaqstan halqynyń 76 paıyzy Prezıdent Toqaevtyń jumysyna kóńili tolady – saýalnama

<p><a href="https:/www.ofstrategy.kz/ru/research/politic-research/item/864-otsenka-naseleniem-deyatelnosti-organov-vlasti-v-kontse-2023-goda" target="_blank" rel="noopener">&laquo;Strategııa&raquo;</a> áleýmettik jáne saıası zertteýler ortalyǵy halyqtyń bılik organdarynyń qyzmetin qoldaýyna baǵa berdi, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

«Buqaralyq aqparat quraldarynda jıi jarııalanatyn ortalyq bılik organdarynyń reıtıngi sııaqty áleýmettaný ónimi sońǵy kezderi sırek kezdesedi. «Strategııa» qoǵamdyq qory osyndaı qoǵamdyq reıtıngti sońǵy ret 2022 jyldyń naýryzynda jasaǵan edi. Osyǵan baılanysty 2023 jyldyń kúzinde biz Eýrazııalyq monıtor ádistemesi boıynsha zertteý júrgizýdi uıǵardyq. Onda áleýmettik ál-aýqat, halyqtyń ómirine qanaǵattaný máselesinen basqa bılik organdarynyń qyzmetin maquldaýdy baǵalaý usynylady. Osylaısha 2023 jylǵy jeltoqsanda búkil el boıynsha 2400 respondenttiń saýalnamasy nátıjesinde Prezıdent Q. Toqaevtyń qyzmetin maquldaý reıtıngi 76,4%-dy qurady. Onyń jumysyn maquldamaǵandar – 14,1%, árbir onynshy respondent jaýap berýge qınalǵan», - dep jazylǵan ortalyq habarlamasynda.

Zertteýde jazylǵandaı, Prezıdenttiń úsh jyldaǵy jumysyn maquldaý kórsetkishi boıynsha eń tómengi deńgeı 2021 jyly tirkelgen (bul kórsetkishke pandemııa aıtarlyqtaı áser etti), keıinirek maquldaý reıtıngi 2020 jyldyń basyndaǵy jaǵdaıǵa qaıta oraldy.

«Bir qyzyǵy, maquldamaıtyndardyń sany 2022 jáne 2023 jyldarmen bir deńgeıde qalyp otyr (14%): ásirese bul - qala turǵyndary men tabysy tómen respondentter. Alaıda, bul reıtıngtiń sensatsııasy retinde ekinshi orynǵa QR Parlamenti jaıǵasqanyn aıtýǵa bolady, ádette ekinshi orynda QR Úkimeti bolatyn. Sondaı-aq, 2021 jylǵy reıtıngtiń kúrt tómendeýinen ótken Parlament jeltoqsandaǵy saýalnamada 50%-dan joǵary maquldaý kórsetkishin aldy. Parlament jumysyn maquldamaıtyndar sany 35% deńgeıinde qalyp otyr. Olardyń ishinde – qala turǵyndary, 35-54 jastaǵy turǵyndar, sondaı-aq eń az qamtylǵan top bar (aqsha tipti tamaqtanýǵa da jetpeıdi). Úkimetke kelsek, joǵaryda aıtylǵandaı, 2007 jyldan bastap Úkimet qyzmetti maquldaý reıtınginde birinshi ret 47% kórsetkishpen úshinshi orynǵa turaqtady. Smaıylov Úkimetine qala men aýyl turǵyndary birdeı narazy, munda kóbinese 45-54 jas aralyǵyndaǵy jáne 65 jastan asqan respondentter, tabysy tómen respondentter bar», - dep keltirildi zertteý derekteri.