«Qazaqstan halqyna» qory sý tasqynynan zardap shekken 200 úıdiń qurylysyn qarjylandyrady

<p>ASTANA. KAZINFORM &ndash; Qazaqstandyqtar sý tasqynynan zardap shekkenderge kómek kórsetý maqsatynda &laquo;Qazaqstan halqyna&raquo; qaıyrymdylyq qoryna qarajat aýdaryp jatyr. Bul týraly qordyń baspasóz qyzmeti málim etti.</p>

«Qazaqstan halqyna» qory Qazaqstan Prezıdenti Qasym-Jomart Toqaevtyń tabıǵı apattan zardap shekken óńir turǵyndaryn qoldaý retinde, aýyldyq jerlerde jalpy somasy 5 mıllıard teńgege 200 turǵyn úı salýdy qarjylandyrady. 

«Eldegi jaǵdaıǵa beı-jaı qaramaıtyn qazaqstandyqtar men uıymdar sý tasqynynan zardap shekkenderge qaıyrymdylyq kómek kórsetý maqsatynda qorǵa júginip jatyr. Azamattar men kásiporyndardyń bastamasyn nazarǵa ala otyryp, qor uıymnyń shottaryna túsken qarajatty jınaýǵa jáne onyń ashyqtyǵy men maqsatty paıdalanylýyn qamtamasyz etýge daıyn», - delingen habarlamada. 

Aqparatta aıtylǵandaı, 1-30 sáýir aralyǵynda zańdy jáne jeke tulǵalardyń barlyq erikti qaıyrymdylyqtary sheshimder negizinde jáne jergilikti atqarýshy organdardyń qoldaýymen zardap shekkender úshin aýyldyq jerlerde turǵyn úı salýǵa jiberiledi. Sondaı-aq, qor donorlar men aýdarylǵan somalardyń mólsherin kórsete otyryp, egjeı-tegjeıli esepti jarııalaıtyn bolady. 

«3 sáýirdegi jaǵdaı boıynsha qordyń shottaryna kompanııalar men jeke tulǵalardan 630 mıllıon teńgeden astam somaǵa qaıyrymdylyq jarna tústi», - deıdi qordan. 

Qaıyrymdylyq qordyń resmı veb-saıtynda kórsetilgen, qolma-qol aqshasyz nysanda ekinshi deńgeıdegi 8 qazaqstandyq banktegi shottaryna qarajat aýdarý arqyly qabyldanady. Jeke tulǵalarǵa yńǵaıly bolý úshin aýdarymdar bankterdiń mobıldi qosymshalarynda «qaıyrymdylyq» bóliminde qoljetimdi.