«Qazaqstan halqyna» qory sý tasqyny saldaryn joıýǵa 10 mlrd teńge bóledi
«Buǵan deıin qor aýyldyq jerlerde 200 úı salý úshin 5 mlrd teńge bólý týraly jarııalaǵan bolatyn. Apattyń aýqymy men onyń saldaryn eskere otyryp, qamqorshylyq keńesi osy maqsattarǵa barlyǵy 10 mlrd teńge bólý týraly sheshim qabyldady», - delingen qordyń habarlamasynda.
Aqparatta aıtylǵandaı, 1-30 sáýir aralyǵynda zańdy jáne jeke tulǵalardan qordyń shottaryna túsken barlyq qaıyrymdylyq qarajaty zardap shekkenderge úı salýǵa aýdarylady. 9 sáýirdegi jaǵdaı boıynsha qor shotyna 970 mln teńge tústi.
«Qor jınalǵan aqsha esebinen 430-dan astam úı salýǵa bolady. Jınalǵan qarjy artqan jaǵdaıda salynatyn úıler sany artady dep kútilýde. Sý tasqyny saldarynan qıraǵan turǵyn úıdi qalpyna keltirý qajettiligi anaǵurlym joǵary ekenin eskere otyryp, «Qazaqstan halqyna» qory janashyr azamattar men zańdy tulǵalardy Memleket basshysynyń zardap shekkenderge kómek kórsetý úshin qarajat jınaý jónindegi bastamasyn qoldaýǵa shaqyrady», - deıdi Qazaqstan halqy qorynan.
Qaıyrymdylyq jasaý úshin https://qazaqstanhalqyna.kz/kk/donors.html resmı saıtynda kórsetilgen shottar men derekterdi paıdalanýǵa bolady.
Sonymen qatar jeke tulǵalar úshin aýdarym bankterdiń mobıldi qosymshasyndaǵy «qaıyrymdylyq» bóliminde qoljetimdi.
Qorǵa túsken qarjy mólsheri týraly egjeı-tegjeıli esep, sondaı-aq qurylys barysy týraly aqparat resmı veb-saıtta ornalastyrylady.
«Qor tústken qarajattyń maqsatty jumsalýyn baqylaýdy qamtamasyz etedi. Eldi mekenderdi, qurylys ornyn tańdaý jáne jer ýchaskelerin berý, qurylys kompanııalary atynan merdigerlerdi aıqyndaý jónindegi jumys qurylysqa tapsyrys berýshi retinde áreket etetin jergilikti atqarýshy organdarmen birlesip júrgiziledi», - dep jazylǵan aqparatta.
Eske sala keteıik, buǵan deıin «Qazaqstan halqyna» qory sý tasqynynan zardap shekken 200 úıdiń qurylysyn qarjylandyratyny týraly habarlaǵan edik.