Qazaqstan ǵylymyn damytýdyń bes jyldyq tujyrymdamasy qabyldanady
Úkimet basshysy ǵylym men bıznes tyǵyz baılanysta bolǵanda ǵana óndiris damyp, halyqqa naqty paıda keletinin atap ótti. Eń aldymen, ǵylymı jańalyqtarǵa muqtaj kásiporyndardy anyqtaý úshin marketıng júıesin engizý kerek jáne Ǵylym qory óz jumysyn ınvestıtsııalyq tartymdylyqty arttyrýǵa, ǵylymı zertteý nátıjelerin kommertsııalandyrýǵa baǵyttaýy tıis.
Osyǵan oraı Á. Smaıylov Bilim jáne ǵylym mınıstrligine birqatar tapsyrma berdi.
«Birinshi, 30 sáýirge deıin Qazaqstan ǵylymyn damytýdyń 2022-2026 jyldarǵa arnalǵan tujyrymdamasynyń qabyldanýyn qamtamasyz etsin. Ekinshi, jas talanttardy izdeý jáne olardy ǵylymǵa tartý mehanızmderin pysyqtasyn, zertteý áleýeti joǵary ǵalymdardyń jańa býynynyń aqparattyq bazasyn jasasyn. Úshinshiden, Ulttyq Ǵylym akademııasyna memlekettik mártebe bere otyryp, ınstıtýtsıonaldyq transformatsııalaý sharalaryn qabyldasyn», - dedi Premer-Mınıstr Úkimet otyrysynda.
Sonymen birge, Ǵylym qorynyń ekonomıkalyq tıimdiligin arttyrýǵa, ǵylymı zertteýlerdi kapıtaldandyrýǵa, olardyń ınvestıtsııalyq tartymdylyǵyn, barlyq kezeńdegi ashyqtyǵyn arttyrýǵa mán berip, rebrendıng jasaý tapsyryldy.
«Bıznes-qoǵamdastyq ókilderimen jáne «Atameken» kásipkerler palatasymen birlesip, Halyqtyń tabysyn arttyrýdyń 2025 jylǵa deıingi baǵdarlamasy jobasyna ǵylymdy qajet etetin óndiristerdi, joǵary tehnologııalyq jumys oryndaryn qurýda ǵylymnyń úlesi bólimin qosyp, onyń naqty ındıkatorlaryn belgileýdi qamtamasyz etsin. Indýstrııa jáne Energetıka mınıstrlikterimen birlesip, ǵylymı-tehnıkalyq keńester qurýdy jáne jer qoınaýyn paıdalanýshylardyń ǵylymı-zertteý jumystaryn qarjylandyrýynyń ortalyqtandyrylǵan mehanızmi engizilisin», - dedi Álıhan Smaıylov.
Aıta keteıik, Úkimet otyrysynda Premer-Mınıstr ǵylym salasyndaǵy qyzmetkerlerdi kásibı merekesimen quttyqtady.
«Búgin elimiz Ǵylym kúnin atap ótedi. Elimizde otandyq ǵylymdy damytý jolynda eńbek etip júrgen barlyq qyzmetkerlerdi kásibı merekesimen quttyqtaımyn! Sizderge tyń ǵylymı jańalyqtar, jumystaryńyzǵa zor tabys jáne sáttilik tileımin! Búgingi Úkimet otyrysynda otandyq ǵylymdy damytý máselesin qaraımyz», - dedi Álıhan Smaıylov.