Qazaqstan Gvıneıa-Bısaýdy Afrıka qurlyǵyndaǵy mańyzdy seriktes retinde qarastyrady

<p>ASTANA. KAZINFORM &mdash; Memleket basshysy Gvıneıa-Bısaý Prezıdentiniń saparyn tarıhı dep baǵalady. Bul týraly elimizge resmı saparmen kelgen Gvıneıa-Bısaý Prezıdenti Ýmarý Sısoký Embalomen keńeıtilgen quramdaǵy kelissóz barysynda Prezıdent Qasym-Jomart Toqaev aıtty.</p>

— Shaqyrýymdy qabyl alǵanyńyz úshin shynaıy alǵysymdy bildiremin. Siz Qazaqstanǵa Gvıneıa-Bısaýdyń Prezıdenti retinde alǵash ret kelip tursyz. Muny tarıhı sapar deýge bolady. Joǵary deńgeıdegi osy kezdesý eki el arasyndaǵy qarym-qatynastyń jańa kezeńine jol ashady dep senemiz. Biz Gvıneıa-Bısaý Respýblıkasyn Afrıka qurlyǵyndaǵy mańyzdy seriktes retinde qarastyramyz. Byltyr memleketterimiz arasynda dıplomatııalyq qarym-qatynas ornaǵanyna 10 jyl toldy. Osy kezeń ishinde biz ózara qoldaý men berik dostyqqa negizdelgen yntymaqtastyq ornattyq. Seriktestigimizdi odan ary damytýǵa mol múmkindik bar, — dedi Qasym-Jomart Toqaev.

Memleket basshysy ásirese ekonomıka jáne saýda-sattyq salalarynyń áleýeti joǵary ekendigin basa aıtty.

— Men búgingi saparyńyzdy eki eldiń yntymaqtastyǵyn nyǵaıtýǵa baǵyttalǵan mańyzdy qadam dep qarastyramyn. Prezıdent myrza, Qazaqstanǵa saparyńyzdyń baǵdarlamasy mazmundy ekenin bilemin. Birqatar óndiris oryndaryna barasyz. Іri ortalyqtardyń jumysyn kóresiz, — dedi Prezıdent.

Buǵan deıin Memleket basshysy Qasym-Jomart Toqaev Aqordada elimizge resmı saparmen kelgen Gvıneıa-Bısaý Prezıdenti Ýmarý Sısoký Embalony saltanatpen qarsy alǵanyn jazǵan edik.