Qazaqstan Grýzııaǵa kaýchýk, alıýmınıı jáne mys jetkizbek

ASTANA. QazAqparat - Otandyq óndiristegi kópirshiktelgen kaýchýk, sondaı-aq alıýmınıı men mys jaqyn arada Qazaqstannan Grýzııa naryǵyna jetkizilýi múmkin. Buǵan Tbılısıde ótken saýda-ekonomıkalyq mıssııa barysynda grýzındik tarap qyzyǵýshylyq tanytqan bolatyn, dep habarlaıdy QazAqparat Qazaqstannyń Syrtqy saýda palatasyna silteme jasap.

Qyrkúıek aıynyń sońynda Qazaqstan-Grýzııa bıznes-forýmy ótti. Basqosýdy Grýzııa Respýblıkasyndaǵy QR Elshiliginiń qoldaýymen Grýzııa Saýda-ónerkásip palatasy jáne Qazaqstannyń Syrtqy saýda palatasy birlesip uıymdastyrdy.

Bıznes-forým taý-ken, qurylys jáne mashına jasaý salalaryndaǵy iri qazaqstandyq kásiporyndary jáne áleýetti grýzındik satyp alýshylar arasynda tikeleı baılanys ornatqan negizgi dıalog alańy boldy. Onyń qorytyndysy boıynsha eki eldiń saýda palatalary arasyndaǵy yntymaqtastyq týraly memorandýmǵa qol qoıyldy. 

Qazirgi ýaqytta qazaqstandyq «IT&M» kompanııasy Grýzııaǵa kópirshiktelgen kaýchýk jetkizýi týraly kelissóz júrgizýde. Sondaı-aq kóshpeli kezdesýlerdiń aıasynda «DIO» kompanııasy Qazaqstandaǵy zamanaýı az shyǵyndy taý-ken óndirisin damytýǵa baǵyttalǵan «KazMinerals» kompanııasynan alıýmınıı men mys satyp alýǵa qyzyǵýshylyq bildirdi.

Qazaqstan Grýzııaǵa munaı ónimderin, azotty tyńaıtqyshtar, makaron ónimderin, temir prokattaryn, temeki, tońazytylǵan balyq, dári-dármekti eksporttaıdy. Al Grýzııadan elimizge biz sharap, alkogolsiz sýsyndar men mıneraldy sýlar, metall qubyrlar, vaktsınalar, sút ımporttalady.

2018 jyldyń qańtary men shildesi aralyǵynda eki eldiń arasyndaǵy syrtqy saýda aınalymy 2017 jylǵy osyndaı kezeńmen salystyrǵanda 67%-ǵa ulǵaıyp,  77 mln AQSh dollaryn qurady.