Qazaqstan Grekııa men barlyq EO úshin senimdi energetıkalyq seriktes – mınıstr Dendıas

ASTANA. QazAqparat – Qazaqstan Grekııa men barlyq Eýropalyq odaq úshin senimdi energetıkalyq seriktes. Muny elimizge alǵash resmı saparmen kelgen Grekııa Respýblıkasynyń Syrtqy ister mınıstri Nıkolas Dendıas málimdedi, dep habarlaıdy QazAqparat tilshisi.

«Qazaqstan Grekııa men barlyq Eýropalyq odaq úshin senimdi energetıkalyq seriktes. Biz gaz dáliziniń qıylysynda turmyz. Sonymen qatar biz – Ortalyq jáne Shyǵys Eýropaǵa shyǵatyn qaqpamyz. Áriptesim ekeýimiz aımaqtaǵy kólik ınfraqurylymyn damytý boıynsha ortaq múddelerdi de talqyladyq. Qazaqstan men Eýropalyq odaq arasyndaǵy qarym-qatynastyń mańyzdylyǵyna toqtaldyq. Grekııa bul baǵyttaǵy yntymaqtastyqtyń ári qaraı damýyna kúsh salýǵa nıetti. Sondaı-aq biz keńeıtilgen seriktestik pen yntymaqtastyq týraly kelisimniń kúshine enýin quptaımyz», - dedi Nıkolas Dendıas.

Sondaı-aq N.Dendıas Aqtaý qalasynda Grekııa konsýldyǵyn ashýǵa kómekteskeni úshin el Úkimetine alǵys bildirdi.

«Grekııa men Qazaqstan bir-birinen alys qashyqtyqta ornalasqan. Biraq bizdiń aramyzdaǵy dostyq qarym-qatynas óte joǵary mańyzǵa ıe. Qazaqstanda 10 myń grek ultynyń ókili tursa, Grekııada myńdaǵan qazaqstandyq turady. Bul bizdiń berik dostyǵymyzdyń nátıjesi dep bilemin. Sonymen birge Qazaqstan Úkimetine rızashylyǵymdy bildirgim keledi. Bizdi Aqtaý qalasynda kútkenine de alǵys aıtamyn. Budan ári qaraı da yntymaqtastyq baılanysymyzdy BUU arqyly júrgizemiz degen úmittemin», - dep rızashylyǵyn bildirdi atalmysh eldiń Syrtqy ister mınıstri.

Aıta keteıik, kezdesý barysynda QR Syrtqy ister mınıstri Muhtar Tileýberdi bıylǵy on aıda Qazaqstan-Grekııa arasyndaǵy saýda aınalymy 1,4 mlrd dolarǵa jetkenin atap ótti.