Qazaqstan gollandtyq raýshan gúlderin Reseıge eksporttaı bastaıdy

ASTANA. QazAqparat - Memleket basshysy Nursultan Nazarbaev «Qazaqstan Respýblıkasynyń Indýstrıaldy-ınnovatsııalyq damýynyń memlekettik baǵdarlamasy: 2016 jyldyń I jartyjyldyq qorytyndysy» atty keńeste Ekibastuz qalasyndaǵy gollandtyq raýshandar ósiretin jylyjaı keshenin iske qosty.

«Qurmetti Nursultan Ábishuly! Biz az ǵana ýaqytta álemdik deńgeıdegi zamanaýı jylyjaı keshenin saldyq! Qazirgi tańda bul joǵarǵy ónimdilik beretin eń iri jylyjaılardyń biri bolyp tabylady. Jylyjaıda 70 jumys orny ashyldy. Onyń kóbine názikjandylar tartyldy. Sheteldik mamandar bizdiń qyzmetkerlerdi tolyǵymen oqytty. Qazir raýshan gúlderimizdi kórshiles Reseıdiń qalalaryna eksporttaýdy bastaǵaly jatyrmyz», dedi  «GreenhouseKZ» JShS dırektory Aıtmaǵambet Sársenbekuly.

Memleket basshysy óz kezeginde keshenniń iske qosylýyna ruqsat berdi.

Jańa jylyjaıda gollandtyq raýshandar topyraqta emes, mıneraldy maqtada tamshylatyp sýarý ádisimen ósiriledi. Aýmaǵy 5 gektar keshen qajetti jaryqty Ekibastuz MAES-1 stansasynan alady. Aldaǵy ýaqytta elimizge golland raýshany shetelden tasymaldanbaıdy dep kútilýde.
«Raýshan gúlderin kezinde bizden gollandtyqtar alyp ketip edi. Endi ony qaıtadan alyp keldik. Qazaqstannyń barlyq jerinde, Astanada satylyp jatyr. Bul da kerek, tabys ákeletin kásiporyn. Men qýanyshtymyn. Óndiristi bastańyzdar», - dedi Elbasy.