Qazaqstan Germanııany energııamen qamtamasyz etip otyr - Shtaınmaıer

ASTANA. QazAqparat – Qazaqstan shıki munaı jetkizý arqyly Germanııany energııamen qamtamasyz etip otyr. Bul týraly Aqordada Memleket basshysy Qasym-Jomart Toqaevpen kelissózderden keıingi BAQ ókilderine birlesken málimdeme jasaý barysynda Germanııa Prezıdenti Frank-Valter Shtaınmaıer aıtty, dep habarlaıdy QazAqparat tilshisi.

«Sońǵy ýaqytta Qazaqstan Federatıvti Respýblıkanyń energııamen jabdyqtalýyn qamtamasyz etýde aıtarlyqtaı úles qosyp keledi. Ásirese, Qazaqstannyń munaıdyń qosymsha kólemin jetkizýdi josparlap otyrǵany qýantady. Bul keleshekte elimizde ornalasqan munaı óńdeý kásiporyndarynyń jumysyn jandandyryp, Shyǵys Germanııamen janar-jaǵarmaımen jabdyqtaýǵa múmkindik beredi», - dedi Frank-Valter Shtaınmaıer.

Sonymen qatar ol Qazaqstan tarapyna qosymsha munaı jetkizetindigi úshin rızashylyǵyn bildirdi.

«Bul energetıkalyq sektor úshin óte jaqsy jańalyq ári qosymsha munaı jetkizý týraly kelisim jasalǵany qýantady. Sol úshin Qazaqstan tarapyna shyn júrekten alǵysymdy bildiremin», - dedi Germanııa Prezıdenti.