Qazaqstan genderlik damý ındeksi boıynsha 58-orynda tur
Ulttyq komıssııa Qaraǵandy oblysynda Otbasylyq jáne genderlik saıasat tujyrymdamasyn iske asyrý jónindegi is-sharalar josparynyń oryndalýy, Qazaqstandaǵy áıelder fýtbolyn damytý perspektıvalary jáne ulttyq komıssııanyń 2019 jylǵy jumysy qorytyndylanyp, aldaǵy jylǵa arnalǵan mindetter qaraldy.
QR Parlamenti Májilisiniń Áleýmettik-mádenı damý komıtetiniń tóraǵasy, QR Prezıdenti janyndaǵy Áıelder isi jáne otbasylyq-demgorafııalyq saıasat jónindegi ulttyq komıssııa tóraıymy Gúlshara Ábdiqalyqova ulttyq komıssııanyń jáne óńirlerde ákimdikter janyndaǵy komıssııalardyń jumysyna, azamattardyń ómirlik qajettilikterine den qoıý, olardy áleýmettik qorǵaýdy qamtamasyz etý qyzmetine nazar aýdarýdy tapsyrdy.
Otyrysta Qaraǵandy oblysyndaǵy frılanser mektepteriniń oń tájirıbesi atap ótildi. Olar belsendi áıelderge ózin-ózi damytýǵa, suranysqa ıe bolýǵa jáne ekonomıkalyq derbes bolýǵa kómektesedi. Oblys boıynsha osyndaı 5 mektep ashylyp, 96 áıel bıznes júrgizýdi úırengen.
Memleket basshysynyń áıelder men balalarǵa qarsy zorlyq-zombylyq úshin jazany kúsheıtý tapsyrmasyn oryndaý úshin Ulttyq komıssııa turmystyq zorlyq-zombylyqqa qarsy is-qımyl, otbasylyq jáne genderlik saıasat bóliginde zańnamany jetildirý jóninde usynystar ázirledi.
Sonymen birge, Gúlshara Ábdiqalyqova bıylǵy qazan aıynda Ulttyq komıssııanyń memorgan ókilderimen birlesip, Qazaqstannyń Jenevadaǵy BUU komıtetinde Áıelderge qatysty kemsitýshiliktiń barlyq nysandaryn joıý týraly konventsııa erejelerin oryndaý týraly Besinshi kezeńdik baıandamasyn qorǵady. Qabyldanǵan sharalar nátıjesinde Qazaqstan 2018 jyly «Genderlik damý deńgeıi joǵary elder» reıtıngine qosyldy jáne genderlik damý ındeksi boıynsha álemniń 160 eliniń arasynda 58-orynǵa turaqtady.
Aıta keteıik, kelesi jyly Qazaqstanda 2030 jylǵa deıingi otbasylyq jáne genderlik saıasat tujyrymdamasyn, áıelder men balalardyń quqyqtaryn qorǵaý júıesin qalyptastyrý týraly Prezıdent tapsyrmalaryn iske asyrý jumystary jalǵasady.
Otyrys sońynda Gúlshara Ábdiqalyqova memlekettik organdarǵa birqatar tapsyrma berdi.