Qazaqstan Gaza sektoryndaǵy zorlyq-zombylyqty toqtatýǵa shaqyrady

ASTANA. QazAqparat - Qazaqstan delegatsııasy kún tártibindegi «Taıaý Shyǵystaǵy jaǵdaı, sonyń ishinde Palestına máselesi» tarmaǵyna sáıkes BUU Qaýipsizdik Keńesiniń tótenshe sessııasyna qatysty, dep habarlady QR SІM baspasóz qyzmetinen.

Qazaqstannyń Birikken Ulttar Uıymy janyndaǵy Turaqty ókili Qaırat Omarov óz sózinde Qazaqstan Respýblıkasy Izraıl Memleketi men Gaza sektory shekarasynda palestınalyqtardyń narazylyq sherýin basýǵa baılanysty beıbit turǵyndar arasyndaǵy qurbandar týraly habardy tereń alańdaýshylyqpen qabyldaǵandyǵyn atap ótti.

«Qazaqstan Respýblıkasy halyqaralyq qoǵamdastyqty kóptegen qurbandyqqa alyp kelgen zorlyq-zombylyqty dereý toqtatýǵa baǵyttalǵan jan-jaqty sharalardy qabyldaýǵa shaqyrady», - dep málimdedi Q. Omarov.

Qazaqstan sonymen qatar, eki tarapty beıbitshilik kúsh-jegerlerdi buzatyn jáne palestınalyqtar men ızraıldikter arasyndaǵy shıelenisti odan ári ýshyqtyrýǵa yqpal etýi múmkin is-áreketterge jol bermeý maqsatynda sabyrlyq pen ustamdylyqqa shaqyrdy. Sondaı-aq, qol jetkizilgen halyqaralyq kelisimderge sáıkes taraptarǵa Ierýsalımniń tarıhı statýs-kvosyn saqtaý týraly úndeý aıtyldy. Turaqty ókil óz sózinde «Qazaqstan Respýblıkasy BUU Qaýipsizdik Keńesi men Bas Assambleıasynyń sheshimderi men qararlaryna qatysty óz aınymastyǵyn rastaı otyryp, beıbit saıası protsestiń aıasynda Taıaý Shyǵystaǵy jaǵdaıdy tolyqqandy retteý úshin dáıekti jáne júıeli túrde qoldaý kórsetedi» dep atap ótti.

Turaqty ókil Palestınanyń memlekettilikke quqyǵyn jáne Izraıldiń qaýipsizdikke quqyǵyn saıası, ekonomıkalyq jáne ekologııalyq ólshemderde, sondaı-aq jańa qaýip-qaterler salasyndaǵy senim sharalarynyń qoldanylýyn qamtamasyz etýdi qosa alǵanda aldyn alý dıplomatııasynyń tıisti quraldaryn qoldaný arqyly qamtamasyz etýge shaqyrdy.