Qazaqstan gaz óndirisin arttyrdy
«2020 jyldyń 7 aıynda gaz óndirý kólemi 13,4 mlrd tekshe metrdi qurady. Bul kórsetkish ótken jyldyń sáıkes kezeńimen salystyrǵanda 1 paıyzǵa joǵary. Tabıǵı gazdy ishki tutyný kólemi 9,5 mlrd tekshe metrdi qurap, ótken jyldyń kórsetkishimen salystyrǵanda 102 paıyz boldy. Suıytylǵan munaı gazyn óndirý kólemi 1,8 mln tonnaǵa jetti. Bul ótken jyldyń 7 aıymen salystyrǵanda 105 paıyz joǵary. Sonyń 938 myń tonnasy ishki naryqta paıdalanyldy», - dedi mınıstr.
Nurlan Noǵaevtyń atap ótýinshe, Energetıka jáne Ulttyq ekonomıka mınıstrlikteriniń suıytylǵan munaı gazyn bólshek saýdada ótkizýge shekti baǵalardy bekitý týraly birlesken buıryǵy qabyldanǵan.
«Osy buıryqty iske asyrý avtokólikke janarmaı retinde qoldanylatyn suıytylǵan gazdyń baǵasyn turaqtandyrýǵa múmkindik berdi. Qabyldanǵan júıeli sharalardyń nátıjesinde avtogaz quıý stansasyndaǵy suıytylǵan gazdyń bólshek saýdadaǵy baǵasynyń tómendeýi qamtamasyz etildi. Atap aıtqanda, óńirlerde suıytylǵan munaı gazynyń ortasha baǵasy 2 paıyzdan 32 paıyzǵa deıin, al Qazaqstan boıynsha 12 paıyzǵa tómendedi», - dedi ol.