Qazaqstan ǵaryshtyq salanyń ınfraqurylymyn damytýdy jalǵastyrady
Bul týraly búgin QR Qorǵanys jáne aeroǵarysh ónerkásibi mınıstri Beıbit Atamqulov 2017 jyldyń qorytyndylary men aǵymdyǵy jylǵy mindetteri boıynsha keńeıtilgen alqa jınalysy barysynda aıtty.
«Báıterek» jańa ekologııalyq qaýipsiz ǵaryshtyq zymyran keshenin qurý jobasy boıynsha Jol kartasyn júzege asyrý, sondaı-aq «Zenıt-M» ǴZK jerústi ǵaryshtyq ınfraqurylym nysandar Reseı Federatsııasy jalǵa alǵan obektiler quramynan shyǵaryp, olardy Qazaqstan Respýblıkasyna berý boıynsha jumystary jalǵastyrylady.
«KazSat» spýtnıktik baılanys júıesiniń jáne Jerdi qashyqtyqtan zondtaý júıesiniń spýtnıkteri shtattyq rejimde qyzmet atqarýda jáne ekonomıka, qorǵanys pen ulttyq qaýipsizdik máseleleriniń sheshýin tabysty qamtamasyz etýde.
2017 jyly ishinde «KazSat» júıesi 5 mlrd teńgeden astam kiris ákeldi jáne shetel spýtnıkterdiń resýrstaryn paıdalanýdy qysqartý arqyly 12 mlrd teńge somasyna ımport almastyrýdy qamtamasyz etti.
2017 jyly memlekettik organdar men uıymdaryna JQZ ǵaryshtyq júıesiniń kómegimen Jer ústiniń 11,5 mln sharshy km kóleminde 1,2 mlrd teńge somaǵa ǵaryshtyq sýretter berildi. Sonymen birge, ımport almastyrý 12 mlrd teńgeden astam qarjyny qurdy.
Budan basqa, ǵaryshtyq tehnologııalardy syrtqy naryqtarǵa ilgeriletý máselesine aıryqsha kóńil bólinedi. Basty nazarda kórshi elderdiń naryqtary: Qyrǵyzstan, Ózbekstan, Tájikstan. Búgingi tańda bul elderde óz ǵaryshtyq baılanys júıeleri joq.
Taıaýda bolǵan Qazaqstan delegatsııasynyń Qyrǵyzstanǵa jumys sapary barysynda yntymaqtastyqtyń túrli baǵyttary boıynsha máseleleri talqylandy, sonyń ishinde qyrǵyz áriptesterine Qyrǵyz Respýblıkasynyń Tótenshe jaǵdaılardy aldyn alý men joıý organdarynyń múddelerine oraı qazaqstandyq ǵaryshtyq júıelerdi birlesip paıdalaný jóninde usynys jasaldy.
Jaqyn arada Qyrǵyz Respýblıkasymen jasalǵan kelisimder sheńberinde jobalardy júzege asyrý boıynsha Jol kartasy ázirlenetin bolady.