«Qazaqstan Ǵarysh Sapary» men Ulttyq ǵarysh agenttiginiń eks-basshylary jemqorlyq kúdigine ilikti
Nur-Sultan qalasynyń sybaılas jemqorlyqqa qarsy qyzmeti «Jerdi qashyqtyqtan zondtaý ǵarysh júıesi» (JQZǴJ) jobasyn júzege asyrýǵa bólingen qarajattyń jymqyrylýyna qatysty isti tergeýde. Tergeý barysynda «Qazaqstan Ǵarysh Sapary» AQ prezıdenti men Ulttyq ǵarysh agenttigi tóraǵasy orynbasarynyń laýazymdy qyzmetin asyra paıdalanǵany anyqtalǵan.
«Qoǵamnyń burynǵy basshysy 2009 jyldyń 6 qazanynda qarjylyq-ekonomıkalyq negizsiz frantsýzdyq «EADSAstrium» kompanııasymen quny 260 mln eýro turatyn eki spýtnık jetkizý týraly kelisimge kelgen. Sonymen qatar qoǵamnyń taǵy bir burynǵy prezıdenti, keıin mınıstrlikterdiń birinde vıtse-mınıstr bolǵan adam «Astana Banki» AQ-ǵa 1,6 mlrd teńgeni negizsiz salýyna qatysty kúdikke ilindi. Atalmysh banktegi defoltqa baılanysty qarajat qaıtpaı qalǵan», - dep habarlaıdy Sybaılas jemqorlyqqa qarsy is-qımyl agenttiginen.
Jemqorlyqqa qarsy kúres qyzmetkerleri «Qazaqstan ǵarysh sapary» men Qazǵaryshtyń osy iske qatysty laýazymdy tulǵalarynyń úıine tintý júrgizgen. Tintý barysynda mańyzdy qujattar men zattar, sonymen qatar ulttyq jáne sheteldik valıýtadaǵy qarajat tárkilengen.
«Sonymen birge jobany júzege asyrýǵa qatysqan laýazymdy tulǵalarǵa qatysty qazir tergeý amaldary júrgizilip jatyr. Tergeý jalǵasýda» delingen habarlamada.