«Qazaqstan Ǵarysh Sapary» kompanııasy qalypty rejimde jumys istep tur - Aıdyn Aıymbetov

ASTANA. QazAqparat - BAQ-ta QR Qorǵanys jáne aeroǵarysh ónerkásibi mınıstrliginiń «Qazaqstan Ǵarysh Sapary» ulttyq kompanııasynyń qarjylyq qıyndyqtarǵa ushyraǵanyny jaıly aqparat jarııalandy, dep habarlaıdy «QazAqparat» HAA tilshisi.

«QazAqparat» HAA spýtnıktik tehnologııalar boıynsha kompanııanyń vıtse-prezıdenti, ushqysh-ǵaryshker Aıdyn Aıymbetovten kompanııanyń qazirgi ahýalyna qatysty saýal jiberdi.

«Rasymen de, 2017 jyldyń 16 qańtarynan bastap, kompanııaǵa únemdeý rejımi engizilip, qyzmetkerler jarty kúndik jumysqa aýysty. Keı kásiporyndar mundaı jaǵdaıdan shyǵýdyń túrli joldaryn izdeıdi, nesıe rásimdep, múlkiniń bir bóligin satady t.b. Kúrdeli jáne ǵylymdy qajet etein salaǵa jatatyn bizdiń kásiporyn ázirge osyndaı ádisti tańdady. Bul ýaqytsha shara jáne kásiporyn turaqtylyǵy men aktıv-spýtnıkter jáne jerústi ınfraqurylymyn saqtaý úshin qajetti tájirıbe», - dep atap ótti A.Aıymbetov.

2017 jyldyń basynan beri  ulttyq kompanııada 240 adam jumys isteýde. Ákimshilik-basqarý quramyndaǵy qyzmetkerlerdiń 25 paıyzynda ǵana jumys kúni qysqardy. JQZ ortalyǵy, qurylys blogy sekildi negizgi tehnıkalyq bólimsheler men taýar ótkizý jáne qyzmet kórsetý basqarmasy tolyq rejımde jumys isteýde. KazEOSat-1 pen KazEOSat-2 JQZ ǵarysh apparattary, ǵarysh apparattaryn basqararatyn, qabyldaıtyn jáne ǵarysh sýretterin óńdeıtin jerústi keshenderi shtattyq rejimde jumys istep tur.

Ǵarysh apparattaryn jınaý-synaq júrgizý kesheniniń qurylysy kestege sáıkes júrýde, dep habarlady «Qazaqstan Ǵarysh Sapary» kompanııasynyń spýtnıktik tehnologııalar boıynsha vıtse-prezıdenti.