Qazaqstan ǵarysh salasyn damytý strategııasyn ázirleýge kiristi
QR Qorǵanys jáne aeroǵarysh ónerkásibi vıtse-mınıstri Marat Nurǵojınniń aıtýynsha, birinshi baǵyt boıynsha Qazaqstan zymyran ushyrý qyzmetteriniń álemdik naryǵyna kirýi kerek.
«Osy oraıda ekologııalyq jaǵynan qaýipsiz «Báıterek» atty zymyran keshenin qurý josparlanyp otyr. Atalǵan keshen Baıqońyr ǵarysh aılaǵyndaǵy «Zenıt-M» nysandary negizinde qurylady. Budan bólek, jeńil jáne óte jeńil sanatqa jatatyn zymyran tasyǵyshtar jasalady», - dedi M.Nurǵojın Qazǵaryshtyń 25 jyldyǵyna arnalǵan forýmda. Atalǵan shara V halyqaralyq «KADEX-2018» qarý-jaraq pen áskerı texnıka kórmesi aıasynda ótti.
Strategııanyń ekinshi baǵyty - ǵarysh arqyly baılanys pen habar taratý qyzmetterin keńeıtý. Sonyń aıasynda kórshi elderdiń baılanys operatorlaryna transponderlerdi jalǵa berý josparlanyp otyr. Budan bólek, KazSat-2R men KazSat-3Rjer serikteri qurastyrylady. Atalǵan apparattar 2023-2029 jyldary paıdalanýǵa beriledi degen jospar bar. «Úshinshi baǵytqa sáıkes, jerdi qashyqtan zondaý qyzmetterin keńeıtý kerek. Endigi kezekte, geoportaldar men gesoservısterdi qurý arqyly aqparattyq qyzmet kórsetýge kóshken mańyzdy. Osyǵan baılanysty KazGeoSat-tyń eki jer serigi jasalady. Olar qazirgi apparattardy kez kelgen ýaqytta almastyra alady. Sondaı-aq, 2023 jylǵa deıin KazSat-1 radarlyq jer serigin qurastyryp shyǵarý josparlanyp otyr. Sóıtip, ǵarysh salasyndaǵy qyzmet kórsetýdiń álemdik naryǵyna shyǵýymyz qajet», - dep atap kórsetti M.Nurǵojın.
Strategııanyń tórtinshi baǵyty ǵarysh tehnıkasyn óz jerimizde qurastyrýdy kózdeıdi. Atalǵan mindetke sáıkes, otandyq materıaldardyń kólemin 55 protsentke jetkizý kerek. Shet elderden tapsyrys alý qarastyrylyp otyr. Besinshi baǵyt aıasynda Qazaqstan ǵarysh keńistigin zertteýdiń jahandyq josparyna atsalysatyn bolady. Osyǵan oraı, dıametri 10 metr bolatyn avtomatty teleskopty ornatý josparlanǵan.
Altynshy baǵytqa sáıkes, spýtnıktik navıgatsııa qyzmetteri keńeıetin bolady. Sonyń aıasynda geodezııa men kartografııaǵa arnalǵan qosymshalar jasalady.
Aıta keteıik, aǵymdaǵy jyly Qazaqstannyń jańa eki jer serigi ǵaryshqa ushyrylady. «Jyldyń sońynda bir taǵy eki jańa jer serigin ǵaryshqa ushyraıyn dep otyrmyz. Atalǵan apparattardy Qazaqstan men Ulybrıtanııa mamandary qurastyrdy. Búginde atalǵan joba 98 protsentke daıyn.Sonyń arqasynda qazaqstandyq mamandardyń bes birdeı jańalyǵy synaqtan ótedi. Olmamandardyń barlyǵy Eýropa men Reseıden tájirıbe jınaqtap qaıtqan», - dep atap kórsetti M.Nurǵojın.