Qazaqstan ǵalymdarynyń bıe sútin onkologııada qoldaný týraly zertteýi patentteldi
«Biz bıe sútiniń emdik-dıetalyq, profılaktıkalyq, ońaltý qasıetterin zertteýmen aınalysamyz. Taǵy bir baǵyt onkologııalyq aýrýlarǵa qatysty. Meniń onkolog-dıssertant shákirtim sút bezi qaterli isiginiń hımıoterapııasynda pasterlengen qurǵaq bıe sútin qoldaný boıynsha zertteý júrgizip jatyr. Bul terapııa agressıvti jáne kóptegen janama áserlerdi týdyrady: aýyr ótedi, ómir sapasy tómendeıdi, anemııa, leıkotsıtter, trombotsıtterdiń tómendeýi, júrektiń aınýy, qusý, jaısyzdyq jáne álsizdik. Biz hımıoterapııa boıynsha bıe sútimen jáne bıe sútinsiz ǵylymı zertteý júrgizdik. Salystyrmaly túrde bıe sútimen jasalǵan zertteý jaqsy nátıje kórsetti», - dedi QazAqparat tilshisine gastroenterolog Baqytjan Bıimbetov.
Onyń aıtýynsha, bıe sútimen qatar júrgen hımıoterapııany naýqastar jeńildeý qabyldaǵan. Patsıentterdiń ómir súrý sapasy jaqsaryp, anemııa túrindegi janama áserler boıynsha zerthanalyq kórsetkish ońaldy. Al, keıbir naýqastarda tipti anemııa bolmaǵan da.
«Emdeýdiń tıimdiligi boıynsha nátıjeler ázirlenip jatyr. Statıstıkalyq óńdeý júrgiziledi. Ázirge hımıoterapııanyń tıimdiligi qaı topta jaqsy, qaı topta nashar ekenin tolyq aıta almaımyz. Degenmen, bıe sútin untaq túrinde qoldaný arqyly hımıoterapııa oń nátıje berdi. Ony mólsherleý de óte yńǵaıly. Nátıjege Tatarstan ǵalymdarymen birge qol jetkizip, patenttedik. Bul – birlesken eńbek», - dedi B. Bıimbetov.
Statıstıkalyq zertteýler aıaqtalǵannan keıin osy taqyrypta dıssertatsııa qorǵalady. Búginge deıin bul taqyrypta 9 maqala jarııalandy, sońǵysy – hımıoterapııada bıe sútin qoldaný boıynsha ǵalymdardyń zertteýi.
Sondaı-aq, QR PІB Medıtsınalyq ortalyǵy aýrýhanasynyń bas gastroenterologi Baqytjan Bıimbetov osy baǵyttaǵy jumysty jalǵastyratynyn aıtty.
«Bizge ǵylymı izdenis jasaǵysy keletin, kózderi janyp turǵan jas mamandar kerek. Biz zertteýshilerge muqtajbyz», - deıdi ol.