Qazaqstan ǵalymdary jol qurylysyna qoldanylatyn jańa tehnologııa oılap tapty

NUR-SULTAN. QazAqparat - Qazaqstan jol ǵylymı-zertteý ınstıtýtynyń prezıdenti, professor Baǵdat Teltaev jol tóseminiń qurylymynda paıdalanylatyn tabıǵı beriktigi tómen tas materıaldardyń turaqtylyǵyn arttyrý úshin jańa tehnologııalar qurylǵanyn habarlady.

Bul týraly QazAqparat QR Indýstrııa jáne ınfraqurylymdyq damý mınıstrliginiń Telegram kanalyna silteme jasap habarlaıdy.

Qazaqstannyń kóptegen óńirlerinde, ásirese, batys aımaqtarda qurylymy keýekti, máselen, áktas jáne ulýtas sııaqty beriktigi tómen tabıǵı materıaldar bar ekeni belgili. Keýekti materıaldardy qoldanǵan kezde tas ylǵaldy sińirip alyp, qysta qatqan kezde buzyla bastaıdy, ıaǵnı tsıkldyq tońý-erý protsesi kezinde tez buzylady. Basqasha aıtqanda, arnaıy tehnologııalarsyz mundaı materıaldy jol salasynda qoldanýǵa bolmaıdy. Sondyqtan jol mamandary materıaldardy basqa aımaqtardan ákelýge májbúr. Al bul qurylys qunyn arttyratyny anyq.

Qazaqstan jol ǵylymı-zertteý ınstıtýtynyń ǵalymdary materıaldardyń turaqtylyǵyn arttyrýǵa múmkindik beretin arnaıy ızolıatsııalyq qabat qurýdyń jolyn tapty.

«Osyndaı ǵylymı zertteýmen hımııa ǵylymdary mamandarymen birigip aınalysyp jatyrmyz. Osy ızolıatsııalyq qabat jasaýdyń eki ádisin, ıaǵnı eki quramyn taptyq. Sol eki quram da alǵashqy zerthanalyq zertteýler kezinde oń nátıje berdi», - dep atap ótti Teltaev.

Aldaǵy ýaqytta osy ádisti jartylaı óndiristik jaǵdaıda zertteý bastalmaq. Joldyń tájirıbelik ýchaskesin salý josparlanýda. Eger ınnovatsııa óziniń tıimdiligin dáleldese, onda qoldanýǵa usynylady.

Ǵalymdardyń aıtýynsha, tehnologııa únemdi, ony praktıkada, ásirese jergilikti mańyzy bar joldarda keńinen qoldanýǵa bolady.