Qazaqstan ǵalymdary qytaılyq mamandarmen seısmıkaǵa tózimdi qurylys boıynsha áriptestikti nyǵaıtty

ASTANA. QazAqparat – «Qazaq qurylys jáne sáýlet ǵylymı-zertteý jáne jobalaý ınstıtýty» AQ Jiangsu Forceset Vibration Control Technology Co., LTD kompanııasymen jer silkinisine tózimdi qurylys boıynsha birlesip jumys isteýdi kózdeıtin yntymaqtastyq týraly memorandýmǵa qol qoıdy. Bul týraly QazAqparat Indýstrııa jáne ınfraqurylymdyq damý mınıstrligine silteme jasap habarlaıdy.

Kezdesý barysynda seısmıkalyq qaýipsizdikti qamtamasyz etý, ozyq tehnologııalardy qoldaný, baqylaý júıelerimen qamtý, sondaı-aq kásibı mamandardy daıarlap, biliktilikti arttyrý máseleleri talqylandy.

«Ózara tıimdi áriptestik arqyly aldaǵy ýaqytta qazaqstandyq jáne qytaılyq mamandardyń qatysýymen naqty birlesken jobalardy júzege asyramyz dep esepteımiz», - deıdi «QazQSǴZI» AQ bas dırektory Begman Qulbaev.

Óz kezeginde qytaılyq kompanııa ókili seısmıkaǵa tózimdi qurylys baǵytyna sáıkes Qazaqstanmen tájirıbe almasyp, óz tehnologııalarymen bólisýge daıyn ekenderin jetkizdi.

Atalǵan memorandýmnyń aıasynda taraptar ǵylymı qyzmetkerlerdiń áleýetin kúsheıtip, tájirıbe almasý, eki eldegi ǵımarattar men qurylys nysandarynyń jer silkinisine qarsy qaýipsizdigin nyǵaıtý úshin seısmıkalyq dempferleý jáne oqshaýlaý tehnologııasyn qoldaný jónindegi birlesken zertteýlerdi júrgizýge ýaǵdalasty. Sonymen qatar, erekshe ǵımarattar men qurylystardy jobalaý boıynsha birlesken arnaıy tehnıkalyq sharttardy ázirlep, seısmıkaǵa tózimdi qurylys teorııasy men tájirıbesi jónindegi birlesken is-sharalardy ótkizý josparlanǵan.