Qazaqstan ǵalymdary aýsylǵa, Nıýkasl aýrýyna qarsy vaktsına ázirlemek

NUR-SULTAN. QazAqparat – Bıologııalyq qaýipsizdik problemalary ǵylymı-zertteý ınstıtýtynyń ǵalymdary birqatar aýrýǵa qarsy vaktsına ázirlemek. Bul týraly búgin Úkimet otyrysynda atalǵan ınstıtýttyń bas dırektory Kúnsulý Zakarıa aıtty, dep habarlaıdy QazAqparat tilshisi.

«Instıtýt ǵalymdary bolashaqta jańa dıagnostıkalyq jáne profılaktıkalyq preparattardy, onyń ishinde aýsylǵa, kontagıozdy plevropnevmonııaǵa, kúıis qaıyratyn usaq janýarlardyń obasyna, Nıýkasl aýrýyna jáne basqalaryna qarsy vaktsına ázirleýdi josparlap otyr», - dedi ınstıtýt basshysy.

Onyń dereginshe, búginde ınstıtýt qurylymyna bıoqaýipsizdiktiń 2 jáne 3-deńgeıindegi 13 ǵylymı zerthana kiredi.

Onda 280 ǵylymı qyzmetker jáne jetekshi vırýsolog, bıolog, bıotehnolog ǵalymdar (akademıkter, ǵylym doktorlary men kandıdattary, PhD) eńbek etedi.

«Instıtýtta mıkroaǵzalar men vırýstardyń sırek kezdesetin erekshe jıyntyǵy bar. Halyqaralyq yntymaqtastyq aıasynda asa qaýipti ınfektsııalarǵa qarsy vaktsınalardy ázirleý týraly DDU-ymen memorandýmǵa qol qoıyldy. Instıtýt ǵalymdary asa qaýipti ınfektsııalarǵa qarsy otandyq vaktsınanyń jáne basqa da bıopreparattardyń 70-ten astam túrin ázirlep, engizdi», - dedi Kúnsulý Zakarıa.