Qazaqstan ǵalamshardyń turaqty damýyn talqylaýǵa álemniń úsh myń ýnıversıtetin biriktirmek

ASTANA. QazAqparat - Álemde turaqty damý máselesin talqylaý úshin Qazaqstan G-Global kommýnıkatıvti alańynda dúnıe júziniń úsh myńnan astam oqý ornyn biriktirýge nıetti. Bul týraly búgin Ortalyq kommýnıkatsııalar qyzmetindegi brıfıngte QR Parlamenti Senatynyń depýtaty, «Ǵalymdardyń eýrazııalyq ekonomıkalyq klýby» qaýymdastyǵy úılestirý keńesiniń teń tóraǵasy Serik Nógerbekov málim etti.

G-Global tuǵyrnamasynda arnaıy aıdar bar ekenine jáne ony ár kezeńde Nobel laýreattary men halyqaralyq iri uıymdardyń jetekshileri júrgizgendigine toqtalǵan ol aldaǵy eki aıda bul aıdardaǵy tulǵa retinde ál-Farabı atyndaǵy QazUÝ rektory, akademık Ǵ.Mutanov bolatyndyǵyn jetkizdi.

«Mutanov myrza alǵa jyljytatyn taqyryp G-Global tuǵyrnamasynda bizdiń ǵalamshardyń turaqty damýyna baılanysty. Onyń josparynda atalǵan taqyrypty talqylaýǵa álemniń úsh myńǵa jýyq ýnıversıtetin jumyldyrý bar. Atap aıtqanda, álemdegi joǵary oqý oryndarynyń oqytýshylary men stýdentteri bul taqyryp boıynsha pikir almasady. Sebebi, turaqty damý G-Global maqsattarymen tolyq sáıkes keledi», - dep atap ótti S.Nógerbekov.

Sonymen qatar ol mamyrdyń aıaǵynda G-Global kommýnıkatıvti tuǵyrnamasynda onlaın-rejimde halyqaralyq iri konferentsııa ótkizilip, onda atalǵan jumystyń qorytyndylary jasalatynyn atap ótti.