Qazaqstan fýtbolshylary Eýropa chempıonatynyń fınaldyq satysyna shyǵa ala ma?
Aldaǵy eki týr bárin sheshedi
Atalǵan irikteý satysynda qazaqstandyq fýtbolshylar óz tobynda qaı orynǵa ıe bolady? Aldaǵy eki oıynda olar eki qarsylasynan basym tússe, qorjynǵa 21 upaı salýyna múmkindigi bar. Al, basty qarsylastary – Slovenııa men Danııanyń enshisine qansha upaı jazylady?
Qazaqstandyq belgili sport kommentatory Ermuhamed Máýlen el quramasynyń qurlyqtyq dodanyń fınaldyq satysyna shyǵý múmkindigi jaıynda oı bólisken edi.
«Ázirge bul saýaldyń jaýabyn aıtý qıynǵa soǵyp tur. Óıtkeni, bul toptaǵy quramalar arasyndaǵy báseke tartysty ótip jatqan jaıy bar. Tájirıbeli Danııanyń ózi qurlyqtyq dodaǵa bara almaı qalýy múmkin. Aldaǵy eki týr oıyndary barlyǵyn sheshedi. Endi toǵyzynshy týrda Danııa men Slovenııa sheberlik baıqasady. Bul oıynda kóp saýaldyń túıini tarqatylady. Biz bul joly elordada San-Marınony qalaıda jeńýge tıispiz. Alǵashqy eki oryndaǵy qarsylastarymyz ekeýara kezdesýinde teń túsken jaǵdaıda bizdiń joldama alý múmkindigimiz arta túsedi. Sebebi, bizdiń qurama enshisine 18 upaı jazylsa, atalǵan eki qarsylasy 20 upaı enshileıdi.
Onynshy týrda Danııa syrt alańda Soltústik Irlandııamen kezdesedi. Soltústik Irlandııa ázirge kóp qarsylasyna ese jiberip júr. Sol oıynda alań ıeleri jeńiske jetkenin qalaımyz. Bul jaǵdaıda Slovenııany tize búktirsek, enshimizge 21 upaı buıyrady. Al Danııa men Slovenııa 20 upaı enshileıdi. Toǵyzynshy týrda olardyń biri basym tússe, bir týr buryn joldamany qaltaǵa basyp úlgeredi. Mundaı jaǵdaıda biz ekinshi oryn úshin talasamyz. Al Slovenııa men Danııa aldaǵy eki oıynda bir-bir márteden jeńiske jetse, onda biz joldamadan qur qalamyz. Qysqasy, aldaǵy eki týrda Slovenııa men Danııanyń upaı joǵaltqany bizge óte tıimdi bolyp tur», - dedi E.Máýlen.
Sondaı-aq, ulttyq quramanyń qurlyqtyq dodaǵa barýǵa taǵy bir múmkindigi bar. Eýropa chempıonaty irikteý satysy arqyly joldamadan qur qalǵannyń ózinde aldaǵy jyly Ulttar lıgasy boıynsha Germanııa jerine bet túzeýge bolady. Bul joly el quramasy Grekııamen joldama úshin sheberlik baıqasady.
Birinshi oryn alýymyz múmkin be
Segiz týrdan keıin el quramasy H tobynda úshinshi orynda tur. Qazaqstandyq fýtbolshylar sońǵy oıynda syrt alańda Fınlıandııany 2:1 esebimen qapy qaldyryp, úzdik úshtikti túıindep tur. Alda turǵan Slovenııa men Danııanyń enshisinde 19 upaıdan bar. Toptan beriletin eki joldama taǵdyry atalǵan úsh quramanyń arasynda sheshiledi.
Bul oraıda qyzylordalyq «Qaısar» sapynda oınaǵan burynǵy fýtbolshy Aldan Baltaev el quramasynyń qurlyqtyq dodada úzdikter qataryna qosylýǵa múmkindigimiz bar ekenin aıtady.
«Jerebe tartý rásiminde Qazaqstan men San-Marınony topta kósh sońynda júretin quramalar qataryna qosqany belgili. Solaı joramal jasaýǵa negiz bar edi. Budan burynǵy irikteý satylarynda el quramasy bir-ekili jeńisimen eleńdetip qoıǵanyn bilemiz. Dese de, kóp jaǵdaıda qarsylastary ese jiberip qoıatyn. Keıbir qarsylastarymyz qazaqstandyq fýtbolyshlardy op-ońaı jeńemiz degen oıyn bildirip qoıdy. Negizinde olar el quramasynyń Ulttar lıgasyndaǵy jetistigin kezdeısoq dep baǵalaǵan sekildi.
Meniń oıymsha, sol básekede qazaqstandyq fýtbolshylar ózderine senimin arttyryp, barlyq tájirıbeli qarsylasynan jeńisti julyp alyp ketýge bolatynyn dáleldegen edi. Shyndyǵynda, solaı bolyp shyqqany qýantady. Eýropa chempıonaty irikteý satysynda bizdiń jigitter jınaqy oıynymen kózge túsip keledi. Burynǵydaı qarsylastyń yńǵaıyna beıimdelip ketý degendi qoıdy. Qorǵanys shebinde saýatty oınap, shabýyl shyqqanda qaqpa toryn týlata alatynyna senimi kúsheıdi. Nátıjesinde biz FIFA reıtınginde alǵashqy úzdik jıyrma qurama qatarynda turǵan Danııany jeńip kettik.
Syrt alańda olarǵa ese jibergenmen, bizdiń jigitter jaqsy oıyn órnegimen jankúıer qoldaýyna ıe boldy. Soltústik Irlandııany eki márte tize búktirdik. Uzaq ýaqyttan beri tisimiz batpaı júrgen Fınlıandııany syrt alańda qapy qaldyrdyq. Ońdy-soldy upaı taratyp júrgen San-Marıno bizge qaýqar kórsete alǵan joq. Qysqasy, ázirge bizdiń Eýropa chempıonaty fınaldyq satysyna barýǵa múmkindigimiz bar. Ol úshin aldaǵy San-Marıno men Slovenııamen oıynda jeńiske jetý mańyzdy. Tipti, bizdiń quramanyń da birinshi oryn alyp ketý múmkindigin joqqa shyǵara almaımyz", - dedi ol.
Onyń aıtýynsha, barlyǵy qazaqstandyq fýtbolshylardyń jigeri, senimdiligi, eńbekqorlyǵyna baılanysty bolyp otyr. Bul synnan olar qalaı óte alady? Ony aldaǵy ýaqyt kórsete jatady.
Arnaıy ortalyqtar ashylsa...
Almatylyq jankúıer Abzal Máýlenqulov keleshekte elimizde fýtboldy damytý baǵytynda oń ózgerister bolý qajettigin aıtady. Ol úshin bul baǵytta ınfraqurylym máselesin jaqsartyp, elimizdiń barlyq qalasynda jańadan stadıondar men arnaıy ortalyqtardyń salynýyn durys dep sanaıdy.
«Elimizde talantty jastar ósip keledi. Ony irikteý barysynda baıqadyq. Sheteldik klýbtar tarapynan qazaqstandyq oıynshylarǵa qyzyǵýshylyq baıqalyp otyr. Degenmen ázirge bizdiń elimizde fýtbolǵa qatysty ınfraqurylym kóńil kónshitpeıdi. Aldaǵy ýaqytta sol iske qarjyly kompanııalardy tarta otyryp, oń nátıjege qol jetkizýge bolady. Bul el fýtbolynyń damýyna oń áserin tıgizedi degen oıdamyn. Jalpy, bıylǵy Eýropa chempıonaty irikteý satysynda Qazaqstan quramasynyń oıyny joǵary baǵalaýǵa turarlyq. Jetistik ońaılyqpen kelmeıdi. Eń bastysy, talantty jastar shoǵyry ósip kele jatqany qýantady», - deıdi ol.