Qazaqstan Frantsııaǵa óńdelgen ónimdi kóbirek jetkize bastady

NUR-SULTAN. QazAqparat - Qazaqstan men Frantsııa arasyndaǵy saýda kólemi týraly QR Saýda jáne ıntegratsııa mınıstrligi málimdedi, dep habarlaıdy QazAqparat tilshisi.

«Pandemııa shekteýlerine qaramastan, eki el arasyndaǵy óńdelgen ónimniń aınalymy 2020 jyly 24% ósip, 1,2 mlrd AQSh dollaryn qurady. Qazaqstannan Frantsııaǵa eksporttalatyn óńdelgen taýarlar kólemi 14%-ǵa (254 mln. AQSh dollary) artty. Bul taraptardyń qosymsha quny joǵary ónimdermen saýda jasaýǵa degen ózara qyzyǵýshylyǵyn bildiredi» delingen baspasóz habarlamasynda.

Buǵan deıin Parıjde qazaqstandyq taýarlardyń tanystyrylymy ótkeni habarlanǵan bolatyn.

QazTrade Frantsııadaǵy Qazaqstan Elshiliginiń qoldaýymen Advantage Group uıymdastyrǵan Parıjdegi «Qazaqstanda jasalǵan» onlaın kórmesine qatysty.

Іs-sharada «SUN-BEE ALTAI» JShS men «Ordabasy qus» JShS-nyń bal jáne kúrketaýyq, AGF-Group kompanııasynyń úı toqyma buıymdary, ZD Flex kompanııasynyń malǵa arnalǵan belgileri men tórt túlikten qan alý júıeleri usynyldy.