Qazaqstan fermerleri bıyl 95 myń bas iri qara mal satyp alady
«2019 jyly fermerlik sharýashylyqtar 63 myń bas iri qara mal ákeldi. Nátıjesinde, asyl tuqymdy mal basynyń úles salmaǵy 12 paıyzǵa jetti. Bıyl 95 myń bas maldy satyp alýǵa fermerlik sharýashylyqtardy nesıelendirýdi josparlap otyrmyz. Jyl basynan bastap 21 myń bas satyp alýǵa fermerler qarjylandyryldy. Jalpy ákimdikterge fermerlik sharýashylyqtardy iri qara mal ákelýge qatysty jumystardy belsendetý kerek, sonyń ishinde daıyn ınfraqurylymy bar sharýa qojalyqtaryn da qarastyrý qajet», - dedi mınıstr Úkimet otyrysynda.
Onyń sózine qaraǵanda, byltyr qanatqaqty joba túrinde satyp alynatyn maldy kepilge qoıý arqyly qarjylandyrý mehanızmi tájırebeden ótkizildi jáne atalǵan tetik bıyl keńinen qoldanylatyn bolady.
«Basty mindetterdiń biri - sıyr eti óndirisiniń tizbegin úzdiksiz júrgizý. Respýblıkada 279 myń mal ornyna arnalǵan bordaqylaý alańdarynyń jelisi jáne qýaty 240 myń tonnaǵa et kombınaty bar. Olardyń júktemeligin arttyrý úshin buqashyqtardy tapsyrý jospary qarastyrylǵan. Fermerlerdi yntalandyrý úshin ónerkásiptik bordaqylaý alańdaryna nemese et kombınattaryna tapsyrylǵan buqashyqtardy tirileı salmaǵyna sýbsıdııalaý mehanızmi qarastyrylǵan. Sonymen qatar, et kombınattary jáne bordaqylaý alańdarynda eksporttyq sharty bolǵan jaǵdaıda, aınalym qarajatyn tolyqtyrýdy qarjylandyrý qarastyrylǵan», - dedi mınıstr.