Qazaqstan EYDU-nyń Bilim saıasaty jónindegi komıtetine múshe bolady
«Komıtet basshylyǵynyń bul shaqyrýyna túrtki bolǵan jaǵdaı - Qazaqstanda bilimdi damytý baǵytynda iske asyrylyp jatqan zor jumystar, atap aıtqanda, jańartylǵan mazmunnyń engizilýi, úsh tilde bilim berý saıasatynyń damýy, 12 jyldyq bilim berý jáne birqatar ozyq is-sharalardy aıtýǵa bolady», delingen habarlamada.
Sonymen qatar, 2015 jyldyń qorytyndylary boıynsha bizdiń elimiz TIMSS zertteýiniń nátıjelerine sáıkes, úzdik memleketter tizimine endi.
«TIMSS jáne PISA zertteýlerine úsh márte qatysqan Qazaqstan 2016 jyly eleýli jetistikterge qol jetkizdi. Bul - oqýshylardyń bilim jetistikterin baǵalaıtyn bedeldi halyqaralyq baǵdarlamalar. TIMSS jáne PISA - barlyq elder tarapynan moıyndalyp, túrli elder mektepteriniń bilim sapasyn ózara salystyratyn birden bir qural. Demek, Qazaqstannyń bilim máseleleri jónindegi bedeldi uıym aıasyndaǵy jumysqa álemniń damyǵan elderimen birge ıyq tirese qatysýyna elimizdiń oqýshylary men muǵalimderi zor úles qosyp otyr», - dep málim etti mınıstrlik.
Atalǵan jetistikter Qazaqstannyń EYDU elderimen birge bilim saıasatyn talqylaýyna esik ashty.
«Qazaqstan buǵan deıin de EYDU-nyń bilim salasy jónindegi iri zertteýlerine qatysyp keldi. Uıymnyń Bilim saıasaty komıtetiniń qatysýshysy retinde elimizdiń jańa jobalardyń júrgizilýine budan ári tereńdeı atsalysýǵa múmkindikterdiń keńeıe túseri anyq. Sonymen qatar bul jaǵdaı elimizdiń EYDU jáne áriptes elder arasynda «teńde - teń» qaǵıdasy boıynsha oqýlarǵa, sondaı-aq úsh halyqaralyq mańyzy bar zertteýlerge - oqýshylardyń bilim jetistikterin baǵalaıtyn halyqaralyq baǵdarlamasyna (PISA), oqý jáne oqytý zertteýlerine (TALIS) jáne eresekter quzyrettilikterin baǵalaý baǵdarlamasyna (RІAAS) únemi qatysýyn qamtamasyz etedi», delingen habarlamada.