Qazaqstan EuroSkills chempıonatynda úzdik nátıje kórsetti

ASTANA. QazAqparat – Jas mamandar arasyndaǵy EuroSkills Gdańsk 2023 Eýropa chempıonaty baıqaýynda Qazaqstan ulttyq quramasy 2 medal jáne 4 medalon jeńip aldy, ázirge bul kórsetkish – Qazaqstannyń eń joǵarǵy nátıjesi, dep habarlaıdy QazAqparat tilshisi.

EuroSkills — Eýropadaǵy kásiptik bilim berý jáne biliktilikti arttyrý salasyndaǵy eń aýqymdy shara, ol eki jyl saıyn uıymdastyrylady.

Bıylǵy baıqaý 5-9 qyrkúıekte Polshanyń Gdansk qalasynda ótken.

«Qazir bul chempıonatqa ınvestorlar, jumys berýshiler kóz tigip otyr. EuroSkills Gdańsk 2023 jarysyna álemniń 32 elinen 600 jas qatysty. Qazaqstan ulttyq quramasynyń sapyna 28 adam endi. Olar 25 quzyret boıynsha qatysyp, kúmis pen qola medal jáne tórt medalon enshilep, tarıhta úzdik nátıje kórsetti», - dedi Oqý-aǵartý mınıstrligi tehnıkalyq jáne kásiptik bilim departamentiniń dırektory Serik Jartybaev ortalyq kommýnıkatsııalar qyzmetinde ótken brıfıngide.

Byltyr Qazaqstan Halyqaralyq reıtıngte 14-orynda bolsa, osy jarystardyń qorytyndysy boıynsha elimiz 10-orynǵa kóterildi.

Sonymen birge, S. Jartybaev WorldSkills chempıonatyna qatysýshylardyń bolashaǵy zor ekenin atap ótti.

«Chempıonat qatysýshynyń árqaısysy, jeńiske jetpese de, osy jarysqa barýynyń ózi onyń joǵary deńgeıli maman ekenin bildiredi. Demek, ony kez kelgen halyqaralyq kompanııa jumysqa shaqyrýy múmkin. Bul jastardyń bolashaǵy zor», - dedi spıker.

Mınıstrlik ókiliniń aıtýynsha, júldegerler el aralap, stýdenttermen kezdesip, sheberlik synyptaryn ótkizbek.

«10 jyl boıy IT-men aınalysyp kelemin jáne Oral aqparattyq tehnologııalar kolledjiniń túlegimin. Aldymen stýdent retinde oblystyq jarystarǵa, sodan keıin respýblıkalyq jarystarǵa túsip, Batys Qazaqstan oblysyna júlde ákeldim. Ári qaraı chempıonattarǵa daıyndyq júrip jatty. 2 jyl daıyndaldym, nátıjesinde kúmis medal aldym. «Veb-ázirleý» saıysynda qarapaıym saıt qurýdan bastap, álemdik deńgeıdegi IT-kompanııalardy jasaıtyn joǵary deńgeıli qosymshalarǵa deıingi túrli modýlderdi oryndaımyz. Sondaı-aq toptyq jumysqa arnalǵan modýlder bar. Meniń oıymsha, bul jarystar ózińdi jaqsy qyryńnan kórsetýge jáne tanylýǵa kómektesedi», - dedi EuroSkills chempıonatynyń kúmis júldegeri Rýslan ıÝsýpov.