Qazaqstan Eýropanyń eki elimen azamattyq ister boıynsha ózara quqyqtyq kómek shartyn bekitpek

ASTANA. QazAqparat – Qazirgi kúni Italııa jáne Horvatııamen azamattyq ister boıynsha ózara shart jasasý baǵytynda tıisti sharalar qabyldanyp jatyr. Bul týraly Ádilet vıtse-mınıstri Botagóz Jakselekova málim etti, dep habarlaıdy QazAqparat tilshisi.

«Qazaqstan táýelsizdik alǵaly beri quqyqtyq kómek kórsetý salasyndaǵy ózara is-qımyldy retteý maqsatynda barlyq eldermen qarym-qatynas ornatyp keledi. Azamattyq jáne quqyqtyq sot isin júrgizý salasynda quqyqtyq qatynastar ornatýda kelisimge keletin elderdiń sany arta tústi. Kelisim negizinen TMD jáne Azııa elderimen jasalǵan. Biraq, Eýropa elderimen mundaı sharttar is júzinde joq. Mysaly, qylmystyq ister boıynsha Frantsııa, Italııa, Bolgarııa, Monako, Soltústik Makedonııa jáne taǵy basqa eldermen kelisim ratıfıkatsııalanǵan. Al, azamattyq ister boıynsha nege olarmen kelisim jasalmaǵan? Bul baǵytta qandaı jumys atqarylyp jatyr?» - dep surady Senat otyrysynda depýtat Janna Asanova.

Saýalǵa Ádilet vıtse-mınıstri Botagóz Jakselekova jaýap berdi.

«Iá, búginde Eýropa elderimen azamattyq ister boıynsha ózara quqyqtyq kómek kórsetý sharttary jasalmaǵan. Óıtkeni, Eýropa elderi shart jasasýǵa nıet tanytpaı otyr. Degenmen, biz bul baǵyttaǵy jumysty jalǵastyryp jatyrmyz. Aıtar bolsaq, qazirgi kúni Italııa jáne Horvatııamen tıisti sharalar júrgizilip jatyr. Sonymen qatar, bizdiń el Gaaga konventsııasyna sáıkes, jeke quqyq boıynsha qatysýshy. Onyń quramyna 82 memleket jáne Eýroodaq elderi kiredi. Osy oraıda, azamattyq jáne qylmystyq ister boıynsha kómek Gaaga konventsııasynyń aıasynda júzege asyrylady», - deıdi Ádilet mınıstriniń orynbasary.

Aıta ketsek, búgin Senatta Qazaqstan men Qyrǵyz Respýblıkasynyń ózara quqyqtyq kómek kórsetý shart ratıfıkatsııalandy.