Qazaqstan Eýropa elderine qaraǵanda 3 ese kóp sý jumsaıdy

ASTANA. QazAqparat – QR IIDM Qurylys jáne turǵyn úı-kommýnaldyq sharýashylyq isteri komıteti tóraǵasynyń orynbasary Ázimbek Pazylbekuly elde sý tutyný mádenıeti qalyptaspaǵanyn synǵa aldy, dep habarlaıdy QazAqparat tilshisi.

«Aýyz sý tapshylyǵy sebepteriniń biri - sýǵa nemquraıly qaraý. Memleket basshysy sý resýrstaryn utymdy paıdalaný kóbinese sý tutyný mádenıetine baılanysty ekenin aıtqan edi, ókinishke oraı bizde ol mádenıet joq. Jeke tutynýda biz Eýropa elderine qaraǵanda úsh ese kóp sý jumsaımyz. Qazaqstan - sý tapshylyǵy bar memleket. Sondyqtan erte jastan bastap sýǵa degen uqyptylyqty qalyptastyrý qajet», - dedi spıker Ortalyq kommýnıkatsııalar qyzmetinde ótken baspasóz máslıhatynda.

Sonymen qatar, tarıfterdi qalyptastyrýdaǵy áleýmettik tásil sý arnalaryn qarjylandyrýdyń jetispeýshiligine jáne sýmen jabdyqtaý júıeleriniń tez tozýyna alyp keledi.

Óz kezeginde, bul sý ysyrabynyń oryn alýyn, apattar sanynyń artýyn jáne sý sapasynyń nasharlaýyn týǵyzyp otyr.

«Sý resýrstaryn únemdeý úshin sýmen jabdyqtaý, sý burý júıeleriniń óndiristik protsesterin avtomattandyrý josparlanýda. Osylaı búkil óndiristik protsessterdegi sý resýrstaryn esepke alýdyń tolyq keshenimen qamtamasyz etý kózdelýde. Ol úshin sýmen jabdyqtaý, sý burý júıeleriniń gıdromodelin jasaý úshin barlyq óndiristik ýchaskelerde sý esepteý quraldaryn ornatý qajet», - dedi Á. Pazylbekuly.

Avtomattandyrý sý arnasynyń aldaǵy shyǵyndaryn, sondaı-aq damýdyń ońtaıly modelderin qurý arqyly sýmen jabdyqtaý jáne sý burý júıelerin salý men rekonstrýktsııalaýǵa baǵyttalǵan memlekettik bıýdjetti ońtaılandyrýǵa múmkindik beredi.

Respýblıkalyq mańyzy bar qalalar men oblys ortalyqtarynda osy jumystardy júrgizý úshin bıýdjetten shamamen 25 mlrd teńge qajet.