Qazaqstan Eýrazııalyq ónerkásiptik kooperatsııa ortalyǵy retinde áreket etýge daıyn – Memleket basshysy

ASTANA. QazAqparat – Prezıdent Qasym-Jomart Toqaev Joǵary Eýrazııalyq ekonomıkalyq keńestiń keńeıtilgen quramdaǵy otyrysynda Qazaqstan Eýrazııalyq ónerkásiptik kooperatsııa aıasynda qaı salany damytýǵa múddeli ekenin atady, dep habarlaıdy QazAqparat tilshisi.

«Qazirgi geosaıası jaǵdaıda Qazaqstan óziniń geografııasy men múmkindikterin eskere otyryp, Eýrazııalyq ónerkásiptik kooperatsııany damytý ortalyǵy retinde áreket etýge daıyn. Bul elektromobılder, magıstraldyq lokomotıvter, vagondar, aýylsharýashylyq jáne jeńil tehnıkalar, qurylys materıaldary men hımııalyq ónimder shyǵaratyn birlesken kásiporyndar bolýy múmkin», - dedi Prezıdent.

Memleket basshysy Qazaqstan ıntegratsııa aıasynda qara jáne tústi metaldardyń ken oryndaryn ıgerý jáne daıyn ónimdi odan ári óńdeý, óndirý baǵytynda birlesken jobalardy iske asyrýǵa daıyn ekenin atap ótti.

Keńeıtilgen keńestiń otyrysyna Qazaqstan Prezıdentimen qatar Reseı Federatsııasynyń Prezıdenti – JEEK tóraǵasy Vladımır Pýtın, Armenııa Premer-mınıstri Nıkol Pashınıan, Belarýs Prezıdenti Aleksandr Lýkashenko, Qyrǵyzstan Prezıdenti Sadyr Japarov, sondaı-aq Ázerbaıjan Prezıdenti Ilham Álıev qatysatyny habarlanǵan bolatyn.