Qazaqstan Eýrazııalyq alıans aıasynda taý-shańǵy kýrortyn damytady

<p>Ózbekstan astanasynda ótip jatqan &laquo;Jibek jolyndaǵy týrızm&raquo; TITF-2023 kórmesi aıasynda Taý kýrorttary Eýrazııalyq alıansynyń tusaýkeseri ótti, dep habarlaıdy <a href="Kazinform" target="_blank" rel="noopener">Kazinform.</a></p>

Bıyl maýsymda «Shymbulaq» (Qazaqstan), «Amırsoı» (Ózbekstan) jáne «Roza Hýtor» (Reseı) kýrorttary birilesip, ózara alıans qurý týraly memorandýmǵa qol qoıǵan. Oǵan saı atalǵan taý kýrorttary qysqy sport túrlerin damytý úshin qolaıly orta qalyptastyrý, ınfroqurylymdy jetildirý jáne kelýshilerge jaǵdaı jasaýda birlese jumys atqarady. Ol úshin arnaıy tujyrymdama ázirleýge kirisken.

Tusaýkeser barysynda alıans úsh kýrortta aldaǵy ýaqytqa ótkizýi tıis sporttyq, mádenı jáne oıyn-saýyq is-sharalarynyń jalpy kúntizbesin bekitýdi usyndy. Sondaı-aq keler jyly naýryzda Sochıdegi «Roza Hýtorda» taý kýrorttarynyń aýqymdy festıvali ótedi. 

Foto: Álıhan Asqar/Kazinform

«Alıanstyń qyzmeti jekelegen qatysýshylarmen qatar tutas Eýrazııa aımaǵyndaǵy taý týrızminiń damýyna zor yqpal etetini sózsiz», - dep atap ótti «Shymbulaq» taý-shańǵy kýrortynyń bas dırektory Rınat Ábdirahmanov.

Munymen qosa alıans ókilderi qazir pysyqtalyp jatqan memleketaralyq týrıstik marshrýttar, úsh kýrortqa barýdyń biryńǵaı júıesin engizý tóńiregindegi máselelerge toqtalyp, Taý kýrorttary Eýrazııalyq alıansynyń korporatıvtik ýnıversıtetinde bilikti kadrlardy daıarlaý josparlanǵanyn aıtty. 

Tashkenttegi kórmede alıansqa Ázerbaıjannyń eń iri «Shahdag» taý kýrorty qosyldy. Tıisti memorandýmǵa alıans qatysýshylary jáne «Shahdag týrıstik ortalyǵy» jabyq aktsıonerlik qoǵamynyń basqarma tóraǵasy Rýstam Nadjafov qol qoıdy.