Qazaqstan EýrAzEQ Daǵdarysqa qarsy qorynan qarjylyq kómek suraǵan emes - B.Sultanov

ASTANA. QazAqparat - Qazaqstan Eýrazııalyq ekonomıkalyq qaýymdastyqtyń Daǵdarysqa qarsy qorynan qarjylyq kómek suraǵan emes. Bul týraly búgin Senattyń jalpy otyrysynda QR Qarjy mınıstri Baqyt Sultanov málim etti. Eske salaıyq, jıynda Senat depýtattary Eýrazııalyq ekonomıkalyq qoǵamdastyqtyń Daǵdarysqa qarsy qorynyń qarajatyn basqarý týraly kelisimge ózgerister engizý týraly hattamany qabyldaǵan edi.

Qujatty talqylaý barysynda depýtattar alty memleket qatysatyn Daǵdarysqa qarsy qordyń qarjylandyryp jatqan jobalary týraly másele kótergen bolatyn. «Qordyń kapıtaly 8,5 mlrd dollar, onyń 7,5 dollaryn Reseı, 1 mlrd dollaryn Qazaqstan qurap otyr. Biraq búgingi kúni bos qarajat bir mıllıard dollar shamasynda. Qazaqstan bul qordan eshqandaı jobalardy qarjylandyrǵan emes. Daǵdarysqa qarsy bolǵandyqtan da, oǵan qıyndyq kórip otyrǵan Tájikstan, Armenııa, Belarýs, Qyrǵyzstan ǵana ótinish berdi», dedi Qarjy mınıstri Baqyt Sultanov.

Al senator Qýanysh Aıtahanov atalǵan qordan Belarýs eline lımıt 1,7 mlrd dollar quraǵanyna qaramastan 2,5 mlrd dollar nesıe alǵanyn alǵa tartty. «Bizdiń osy qordaǵy nesıe portfelimiz 2 mlrd 30 mln dollar. Alaıda, biz búginge deıin bir de bir dollar nesıe almadyq. Endi daǵdarys kezinde qordaǵy qarajatty tartýǵa bolmaı ma? Árbir tıyn esepteýli turǵan shaqta nege biz osy qordan qarajat tartpaımyz?» - dep surady depýtat Qýanysh Aıtahanov.

Óz kezeginde mınıstr Baqyt Sultanov Qazaqstanda qorǵa múshe basqa elderdegideı problema bolmaǵanyn alǵa tartty. «Qazaqstannyń qarjy júıesi turaqty, bıýdjettik túsimder de ornyqty. Sondyqtan da, Qazaqstan eshqandaı ótinish jasaǵan emes. Sonymen qatar, qordyń qarjylandyrý rásimi de bar. Máselen, ondaı kómek suraǵan elder tıisti reformalardy júzege asyrý kerek. Al Qazaqstan birqatar reformalar boıynsha qorǵa múshe elderdiń aldynda kele jatyr. Sondyqtan da, bizdiń taraptan ótinish jasalmady», dedi B. Sultanov.