Qazaqstan et eksportynda jańa naryqtardy ashty

ASTANA. QazAqparat - Búgin Úkimet otyrysynda QR Aýyl sharýashylyǵy birinshi vıtse-mınıstri Qaırat Aıtýǵanov agroónerkásiptik salada ónim eksporty jaıynda baıandady, dep habarlaıdy QazAqparat.

«2017 jyldyń 9 aıynda aýyl sharýashylyǵy ónimderi men qaıta óńdeý ónimderiniń eksporty 1,5 mlrd AQSh dollaryn qurady, bul kórsetkish ótken jylmen salystyrǵanda 13 paıyzǵa artty, sonyń ishinde  qaıta óńdeý ónimderi 10 paıyzǵa ósti», - dedi Aıtýǵanov.

Onyń sózine qaraǵanda,  muzdatylǵan iri qara mal etiniń eksporty 2 esege artty. «Bul Reseıge jetkizilimderdiń 83 paıyzǵa ulǵaıýyna jáne Birikken Arab Ámirligine birinshi eksportynyń ashylýyna baılanysty bolyp otyr», - dep naqtylady birinshi vıtse-mınıstr.

Budan bólek, qoı etin shetelge shyǵarý kólemi 8 esege ósip otyr. Osy oraıda aǵymdaǵy jyly jańa naryqtar Iran, Bahreın jáne BAÁ-de  ashylýyna baılanysty tıisti ońtaıly kórsetkishterge qol jetkizildi.

Aıta keteıik, jún eksporty 1,8 esege joǵarylaǵan. Bul rette Qytaıǵa jetkizilimderdiń ulǵaıýy áser etti.

Ósimdik sharýashylyǵynan kartop eksporty 19 esege ósti, Reseıge tomat tuzdyǵy men qııardyń eksporty 3,5 esege ósti, Qytaı men Reseıge jańǵaq eksporty 3 esege kóterildi.

«Ulybrıtanııaǵa alǵashqy ret arpa eksporttaldy, Iran men Mońǵolııaǵa sulyny jetkizý qaıta jańartyldy. Al kúrish, qaraqumyq, jarma, maıly daqyldar, jemister, baqsha daqyldary, qarbyz, keptirilgen burshaq daqyldary men kókónister eksporty TMD, Eýropa, Taıaý Shyǵys jáne Qytaı elderine 2 ese artty», - deıdi Qaırat Aıtýǵanov.