Qazaqstan eshbir eldiń azamatyna shekarada qasaqana tekserý júrgizbeıdi

ASTANA. QazAqparat - Qazaqstan álemdegi kez kelgen eldiń azamattaryna shekarada qasaqana tekserý júrgizbeıdi. Bul týraly búgin QR Syrtqy ister mınıstrligi baspasóz qyzmetiniń jetekshisi Aıbek Smadııarov aıtty, dep habarlaıdy QazAqparat tilshisi. 

Qyrǵyz dıplomattary nazar aýdarǵan, Almaty halyqaralyq áýejaıynda oryn alǵan Qyrǵyzstan azamattaryna qatysty Qazaqstannyń quzyretti organdarynyń tekserý is-sharalaryn túsindirý maqsatynda elimizdiń Syrtqy ister mınıstriniń orynbasary Ǵalymjan Qoıshybaev jáne Ulttyq qaýipsizdik komıteti Shekara qyzmetiniń dırektory Darhan Dilmanov Almatyda arnaıy jumys kezdesýin ótkizdi. Іs-shara barysynda múddeli vedomstvolardyń qatysýymen QR memlekettik shekarasynda baqylaý-ótkizý pýnktterinde ótkizý tártibin jetildirý máseleleri, shekara qyzmetkerleriniń negizsiz is-áreketterine jol bermeý jónindegi máseleler talqylanyp, oǵan arnaıy qyzmettik tekserý bastaldy»,- dedi Aıbek Smadııarov. 

Onyń aıtýynsha, keleshekte qajetti rásimderdi júzege asyrý kezinde túrli túsinbeýshilikterdi boldyrmaý maqsatynda obektıvti baqylaý sharalary kesheni jáne tıisti vedomstvoaralyq komıssııa qurýdy qosa alǵanda, buzýshylyqtarǵa jyldam áreket etý júzege asyrylady. 

«Buǵan qosa, kózdelgen sharalar memlekettik shekaradan ótý ýaqytyn mınımýmǵa deıin azaıtady dep kútilýde. Jalpy alǵanda, qazaqstandyq tarap álemdegi eshbir eldiń azamattaryna qasaqana tekserý júrgizbeıtinin jáne QR memlekettik shekarasyndaǵy baqylaý pýnkterinen ótý rásimderi qabyldanǵan halyqaralyq standarttar men normalarǵa saı ekenin rastaımyz»,- dedi SІM ókili.