Qazaqstan Erıtreıaǵa qarsy sanktsııalardy joıý týraly BUU QK-niń qararyn qoldady

NЬıÝ-IORK. QazAqparat - Qazaqstan Respýblıkasy BUU Qaýipsizdik Keńesinde Erıtreıa eline qarsy sanktsııalardy joıý týraly qarardy qoldady. 2017 jyldyń qańtar aıynan bastap Qazaqstan Somalı men Erıtreıaǵa qatysty BUU Qaýipsizdik Keńesiniń sanktsııalar jónindegi komıtetiniń tóraǵasy bolyp tabylady, dep habarlaıdy QazAqparat QR Syrtqy ister mınıstrligine silteme jasap.

Qazaqstannyń BUU janyndaǵy Turaqty ókili Qaırat Omarov Afrıkanyń múıisinde, sonyń ishinde Erıtreıa, Efıopııa, Djıbýtı jáne Somalı elderindegi teńdessiz oń ózgeristerdi atap ótti. Ústimizdegi jyldyń maýsym aıynda búkil álem Erıtreıa men Efıopııa arasyndaǵy tarıhı tatýlyqqa kýá boldy - eki eldiń basshylary saıası erik-jiger tanytyp, 80 myńnan astam adamnyń ómirin qıǵan 20 jyldyq qarsylasýyn toqtatty.

Bul oqıǵa aýmaqtyq qaqtyǵystarǵa oraı 10 jyl boıy bólinip kelgen  Erıtreıa men Djıbýtıdiń jaqyndasýyna jáne joǵary deńgeıdegi alǵashqy baılanystarǵa jol ashty. Ekijaqty kelisimdermen qatar Erıtreıa, Efıopııa jáne Somalı saıası, ekonomıkalyq, áleýmettik jáne mádenı baılanystardy nyǵaıtýǵa jáne óńirlik beıbitshilikti, qaýipsizdikti jáne damýdy yntalandyrý jónindegi kúsh-jigerlerin ornatýǵa kelisti.

BUU Qaýipsizdik Keńesiniń otyrysynda sóılegen sózinde Q.Omarov Afrıkanyń múıisi elderi óńirlik problemalardyń sheshimderin tabýǵa qabilettiligi men tabandylyǵyn kórsetkenin atap ótti. Óńirdegi oń ózgeristerge halyqaralyq qoǵamdastyqtyń qoldaý kórsetýi de asa mańyzdy.

«Óńirdegi beıbitshilik óńirlik kóshbasshylardyń batyl sheshimderiniń nátıjesi boldy. Bul uzaqqa sozylǵan shıelenisterdiń, qaqtyǵystar men básekelestik dáýiriniń aıaqtalýyn kórsetedi jáne beıbit, ózara tıimdi yntymaqtastyqtyń jańa dáýirine jol ashady», - dedi Qazaqstan elshisi.

«Dıplomatııa, deldaldyq, senimdi nyǵaıtý jáne dıalog, damýdaǵy ınvestıtsııalarmen qatar elder arasyndaǵy daýly máselelerdi sheshýdiń senimdi joly bolyp tabylady. Biz Djıbýtı men Erıtreıa arasyndaǵy ózara is-qımyldy qoldaımyz jáne olardy ekijaqty qarym-qatynastarda qalǵan máselelerdi sheshý úshin odan ári kúsh-jiger jumsaýǵa shaqyramyz», - dep qosty Q.Omarov.

Qazaqstan Erıtreıaǵa qarsy sanktsııalardy alyp tastaý týraly sheshim úshin daýys bergen kezde, óziniń Afrıkada beıbitshilik pen qaýipsizdikti ornatýǵa degen umtylysyn basshylyqqa aldy. Elimizdiń Qaýipsizdik Keńesindegi jumysynyń osy baǵyty Prezıdent Nursultan Nazarbaevtyń BUU Qaýipsizdik Keńesine óziniń saıası joldaýynda anyqtaǵan 7 basymdyqtarynyń biri boldy.

BUU Qaýipsizdik Keńesiniń Somalı jáne Erıtreıaǵa qatysty sanktsııalar jónindegi komıtetiniń tóraǵasy retinde Qazaqstan Erıtreıadan sanktsııalardy alyp tastaý týraly Keńes músheleriniń sheshimine eleýli úles qosty. Erıtreıanyń halyqaralyq oqshaýlaný jyldary bul eldiń resmı tulǵalardyń osy jyldyń qyrkúıek jáne qazan aılarynda Nıý-Iorkte sanktsııalyq komıtettiń tóraǵasymen alǵashqy baılanystarmen aıaqtaldy. Qazaqstannyń Erıtreıamen yntymaqtastyqty nyǵaıtý jónindegi kúsh-jigeri osy elge qarsy 9 jyldyq sanktsııalar rejımi aıaqtalýynyń mańyzdy alǵysharty boldy.

Qazaqstandyq delegatsııanyń sanktsııalyq komıtettiń basshysy retinde atqarǵan jumysynyń qorytyndylary Qaýipsizdik Keńes músheleritarapynan  joǵary baǵa ıe boldy. Otyrys barysynda Erıtreıa men Djıbýtı delegatsııalary Qazaqstanǵa óńirdegi turaqty beıbitshilikti ornatýǵa tolyqqandy qoldaý kórsetkeni úshin alǵysyn bildirdi.

Erıtreıaǵa qarsy sanktsııalar 2009 jyly engizilgen bolatyn.

BUU Qaýipsizdik Keńesi qabyldaǵan qararǵa qarý-jaraq embargosyn alyp tastaý, jol júrýge tyıym salýdy, aktıvterdi toqtatýdy jáne maqsatty sanktsııalardy joıý kiredi.