Qazaqstan elshisi Slovenııa prezıdentine senim gramotalaryn tabystady

<p>ASTANA. KAZINFORM &ndash; Prezıdent saraıynda Qazaqstannyń Slovenııadaǵy Elshisi Danııar Sarekenovtiń Slovenııa Prezıdenti Natasha Pırts Mýsarǵa senim gramotalaryn tapsyrý rásimi saltanatty túrde ótti. Bul týraly SІM baspasóz qyzmeti málim etti.</p>

Saltanatty rásim aıaqtaǵan soń suhbat barysynda Elshi Qazaqstan Prezıdenti Qasym-Jomart Toqaevtyń jyly lebizi men izgi tilekterin jetkizdi jáne resmı Astananyń Lıýblıanamen kópqyrly áriptestikti odan ári nyǵaıtýǵa jáne keńeıtýge múddeli ekenin rastady. Munyń aıqyn dáleli — Slovenııa astanasynda Qazaqstannyń dıplomatııalyq ókildiginiń ashylýy.

Elshi eki el arasyndaǵy yntymaqtastyqtyń qazirgi joǵary deńgeıin atap ótip, saýda-ekonomıkalyq jáne ınvestıtsııalyq salalarda ózara is-qımyldy jandandyrý men birlesken jobalardy júzege asyrýdyń mańyzdylyǵyna bas nazar aýdardy.

Óz kezeginde Slovenııa Prezıdenti qazaq dıplomatyn resmı mıssııasynyń bastalýymen quttyqtap, Qazaqstan basshylyǵyna Lıýblıanada elshilik ashý týraly sheshimin joǵary baǵalaıtynyn málimdedi jáne aldaǵy ýaqytta da ózara tıimdi qarym-qatynastardy damytýǵa baǵyttalǵan óz umtylysyn qýattady.

Slovenııa basshysy 2025 jyly Qazaqstanǵa josparlanǵan saparyn rastap, QR Prezıdentimen kezdesý men kelissózderi eki el arasyndaǵy qalyptasqan qarym-qatynastardy jańa deńgeıge kóteretinine senim bildirdi.

Kezdesý sońynda Slovenııa Prezıdenti Elshige eki el arasyndaǵy qarym-qatynastardy nyǵaıtý jolynda tabys tilep, Qazaqstan basshylyǵy men halqyna izgi tilekterin jetkizdi.

Buǵan deıin Prezıdent birqatar memlekettiń elshilerinen senim gramotalaryn qabyldaǵanyn habarlaǵanbyz.