Qazaqstan Elshisi Ázerbaıjan Parlamenti tóraıymymen kezdesti

<p>BAKÝ. KAZINFORM &ndash; Qazaqstannyń Ázerbaıjandaǵy Elshisi Álim Baıel Ázerbaıjan Respýblıkasy Mıllı Májilisiniń tóraıymy Sahıba Gafarovamen kezdesti. Taraptar qazaq-ázerbaıjan qatynastarynyń damý dınamıkasyn jan-jaqty talqylady. Bul týraly &laquo;Qazaqparat&raquo; agenttiginiń Ázerbaıjandaǵy menshikti tilshisi Serikbol Qoshmaǵanbetov habarlady.</p>

Suhbattasýshylar eki baýyrlas eldiń parlamentaralyq yntymaqtastyǵyn odan ári nyǵaıtýdyń, sondaı-aq TúrkPA sııaqty kópjaqty alańdar sheńberindegi ózara is-qımyldyń mańyzdylyǵyn atap ótti.

Basqosý barysynda Sahıba Gafarova Memleket basshylary arasyndaǵy senimdi dıalogtyń mańyzdylyǵyna nazar aýdaryp, eń joǵary jáne joǵary deńgeıdegi ózara saparlar baýyrlastyq qatynastardy odan ári nyǵaıtýǵa yqpal etetinin tilge tıek etti.

Parlament tóraıymy ekijaqty yntymaqtastyqty damytýdaǵy Qazaqstan dıpókildiginiń róline de nazar aýdardy. Osy rette S.Gafarova 2023 jyldyń jeltoqsanynda Ázerbaıjanda ótken Qazaqstannyń mádenıet kúnderiniń deńgeıde uıymdastyrylǵanyn atap ótti.

Óz kezeginde Álim Baıel Qazaqstan men Ázerbaıjan birge eki el úshin ǵana emes, búkil óńir úshin úlken mańyzy bar birqatar iri ekonomıkalyq jobalardy iske asyryp jatqanyn atap aıtty.

Sonymen qatar, Elshi 7 aqpanǵa josparlanǵan prezıdenttik saılaý baýyrlas Ázerbaıjannyń odan ári damýyna negiz bolady degen úmitin bildirdi.

Taraptar parlamentaralyq yntymaqtastyqtyń ekijaqty qarym-qatynastardyń mańyzdy ólshemi ekenin aıtyp, taıaý bolashaqqa arnalǵan birqatar naqty is-sharalar men bastamalardy talqylady. Suhbattasýshylar, sondaı-aq, óńirlik kún tártibindegi ózekti máseleler boıynsha pikir almasty.

Qazaq dıplomaty Ázerbaıjan Parlamenti Halyqaralyq qatynastar jáne parlamentaralyq baılanystar komıtetiniń tóraǵasy Samed Seıdovpen de kezdesti. Taraptar ózara qyzyǵýshylyq týdyratyn birqatar máseleler boıynsha pikir almasty.